“Wakamtolea Tunu; Dhahabu Na Uvumba Na Manemane”
Epifania ni sherehe ambapo tunaadhimisha tokea la Bwana kwa kila mmoja ulimwenguni. Mamajusi au Wafalme watatu toka Mashariki (Melkiori, Baltazari na Gaspari) wanaokwenda kumwabudia Bwana Yesu na kumsujudia ni ishara ya Yesu kujidhihirisha kwa watu wa kila rangi na taifa na lengo kuu ni ili kila taifa limwabudu. Moja ya ombi kuu katika sikukuu hii ni kuomba ili mataifa yote yapate kumjua Bwana Yesu na kumwabudu kama walivyofanya hawa Mamajusi. Kila mwanadamu analo jukumu kubwa la kufanya maamuzi ya kumtafuta Bwana kama walivyofanya hawa Mamajusi. Zaburi ya wimbo wa katikati leo inawaalika watu duniani kote kumwabudu Mwenyezi Mungu. Wafalme wote wa duniani wanaalikwa waje na zawadi kumsujudia Bwana. Yafaa na sisi tujiulize ni zawadi gani tumekuja nayo mbele za Bwana? Mamajusi walitumia zawadi zao kuaanzisha urafiki na Bwana Yesu.
Nasi tusiache kutumia tulichopewa na Bwana tupate kuanzisha naye urafiki. Bwana Yesu ni nuru ya mataifa yote (Luka 2:32). Bwana Yesu ndiye mwanga wa mataifa na watu wote lazima wamjue yeye. Huu ni unabii uliotolewa na Simeoni. Sisi tunalo jukumu la kuitangaza nuru hii kwa ulimwengu mzima. Bwana Yesu aliwaeleza wanafunzi wake kwamba wakaitangaze injili yake kwa mataifa yote (Matayo 28:18-20). Leo tunashangazwa na hawa wafalme toka Mashariki. Tunajiuliza, wamemjuaje Yesu na kuja kumwabudu?
Hakika nguvu ya Roho wa Bwana ni kuu na Bwana hana ubaguzi. Watu wote ni wake na anapenda aabudiwe nao. Na Mamajusi walifika na zawadi za thamani kubwa; dhahabu, ubani na manene. Sisi labda hatuna zawadi kubwa hivi lakini upendo wetu kwa Mungu na watu wake na nia yetu njema yatosha. Dhahabu iliashiria ufalme wa Yesu, ubani ikaashiria umungu wake na manene ilibashiri kifo chake. Nasi tujifunze kuleta sadaka iliyo bora kwa Bwana.
Mamajusi baada ya kumwabudu Yesu, hawakurudi kupitia Yerusalemu. Yerusalemu maana yake ni mji wa amani lakini mfalme wake, yaani Herode, hakuwa na amani na malengo yake yalikuwa ni kumwua Yesu. Yesu tangu akiwa mtoto mchanga alikumbana na waliompenda na waliomkataa. Hizo ndizo sura mbili za maisha ya mwanadamu.
Lakini tukijikabidhi kwa Bwana, yeye atatulinda kama alivyomlinda Bwana Yesu na Herode aliyetafuta uhai wake. Herode alitaka kuwadanganya wale Mamajusi ili apate toka kwao maelezo muhimu yatakayopelekea kumwua mtoto Yesu. Kwa hakika kati ya wale wanaojionesha kutaka kumwabudu Yesu, wapo Maherode pia. Wapo wanaotaka kuliharibu kanisa, wapo wanaotaka kuwaharibu watumishi wa Mungu na nia zao mbaya. Mamajusi walikuwa na tabia tofauti na ya Herode.
Herode ni mbinafsi bali mamajusi ni wakarimu, mamajusi walitoa kwa Yesu zawadi za heshima lakini Herode aliwauwa watoto wa mji wa Yerusalemu na kuleta huzuni mji mzima. Maamjusi walitaka maisha yatawaliwe na faraja lakini Herode alitaka yatawaliwe na vilio na ubinafsi. Mwishowe, Mamajusi waliishia kuwa na furaha, bali Herode aliishia katika kifo na kupoteza yote aliyongangania kwa nguvu. Kila mmoja wetu anahitaji kufanya safari kumwelekea Bwana Yesu aupate ukombozi kama walivyofanya Mamajusi na zipo sehemu za maisha yetu zenye kumhitaji Bwana Yesu zaidi.
Kama Mamajusi walivyoitegemea neema ya Mungu, nasi tunaihitaji pia hiyo neema. Siku ya leo, tunapewa jukumu kubwa la kuhakikisha kumwona Bwana Yesu ndani ya maisha ya wenzetu. Bwana Yesu alijitahidi kuwafikia wote. Nasi tutambue kwamba ni jukumu la kanisa kuwafikia wote. Ni jukumu letu pia kutoa msaada kwa vikundi vyote vyenye kujihusisha katika huduma mbalimbali hasa za kiroho.
Sala
Bwana, niwezeshe niweze kujitoa kama zawadi kwako, Amina
©️Pd. Prosper Kessy OFMCap.