MAJITOLEA YANAHITAJI KUJISADAKA
Kuna mwanasaikolojia anayeitwa David Joseph Schwartz aliyesema, “ Mafanikio yote makubwa yanahitaji muda.” Somo la kwanza limeeleza jinsi ambavyo mambo yanatarajiwa kuwa mbeleni na ni mazuri baada ya taabu. Jamii husika inaelezwa isubiri kwa hamu mambo hayo mazuri. Kinachotakiwa tu ni maandalizi. Injili nayo inaonyesha jinsi ambavyo hawa wahusika wanaomsaidia huyu mwenzao mgonjwa hadi kutoa dari. Hili ni swala lililowagharimu muda na nguvu nyingi na utaalamu, haikuwa kazi rahisi. Kupanda kwao juu ya dari, ni wazi kuwa nyenzo kama ngazi zilitafutwa, kamba ya kukifunga kitanda alicholalia mgonjwa ili kumpandisha juu, nyundo ya kung’olea misumari. Yote haya yalichukua muda. Tujifunze leo kuwa na subira katika kutaka mazuri. Wahenga wanasema, “ Subira yavuta heri.” Pia tujifunze kuwasaidia wengine bila kujibakiza mpaka pointi ya mwisho. Tumshirikishe Mungu katika mipango yetu, tuone na kuamini kuwa Mungu anaweza na tusikate tamaa.
Sala Baba Mungu tupe moyo wa subira na majitolea kamili katika kuwasaidia wenye shida. Amina
@ Claretian Publication