Mtakatifu Peter Kanisius, Padri Na Mwalimu Wa kanisa 21 Desemba 2023
KUISHI KWA UELEWANO KWALETA FURAHA
Kuna usemi usemao, “Maneno mazuri humtoa nyoka pangoni.” Hii ni ashirio kuwa tunapokuwa tunawasiliana, tunatakiwa tuwe tunapeana maneno ya kuleta furaha na faraja. Jamii ya leo imegubikwa na mafarakano na kutokuelewana kwa ndugu na ndugu, familia na familia. Haya hutokana na visababu vidogo vidogo ambavyo havina mbele wala nyuma. Hata watu hufikia mahali wanaapizana, kutukanana na hata kupigana. Bikira Maria anatupa mfano halisi wa mapendo. Anapoenda kwa Elizabeti, anamsalimia kwa maneno ya upole na yenye kuleta furaha. Elizabeti anajawa na faraja hadi kitoto kichanga kilichokuwa tumboni mwake kinaruka kwa furaha. Leo hii wengi wetu, hata tukijiita Wakristo, hatuongei, hatusalimiani, tuna visasi na vinyongo visivyoisha. Tunasahau kuwa hapa duniani ni mahali pa mpito. Leo hii tunaalikwa tujawe na furaha ya Kristo.
Sala Mama Bikira Maria tuombee neema ya kupendana kindugu.Amina.
@ Claretian Publication