SOMO 1
Mithali 31:10—13, 19—20, 30—31
Mke mwema, ni nani awezaye kumpata? Thamani yake ni bora kupita lulu. Moyo wa mumewe humwamini; wala hakosi kupata faida kwake. Humtendea mambo mazuri si maovu, siku zote za maisha yake. Anajipatia sufu na kitani, anafanya kazi kwa mikono radhi. Hutia mkono wake kusokota uzi, vidole vyake hushika pia. Huwasaidia maskini, na kunyosha mikono yake kuwasaidia wahitaji. Urembo ni udanganyifu, uzuri ni upuuzi; mwanamke anayemcha Bwana, ndiye anayestahili kusifiwa. Mtukuzeni kwa ajili ya mapato ya kazi yake, na huko malangoni matendo yake yatangaze sifa zake.
Neno la Bwana.
ZABURI YA KUITIKIZANA
ZABURI 128:1—2, 3, 4—5 (K. 1a)
K. Heri kila mtu amchaye Bwana.
Heri kila mtu amchaye Bwana
aendaye katika njia za Mungu.
Hakika utakula matunda ya kazi ya mikono yako;
utaona heri na kwako kutakuwa kwema. K.
Mkeo atakuwa kama mzabibu
uzaao ndani ya nyumba yako,
wanao kama machipukizi ya mizeituni,
wakizunguka meza yako. K.
Ndivyo anavyobarikiwa yule amchaye Bwana.
Bwana na akubariki toka Sioni,
na uione fanaka ya Yerusalemu,
siku zote za maisha yako. K.
SOMO 2
1 Wathesalonike 5:1—6
Ndugu zangu: Hamna haja tuwaandikie juu ya wakati na saa. Maana wenyewe mmejua barabara kwamba siku ya Bwana inakuja kama mwizi usiku. Wakati watu wasemapo, "Sasa tuna amani na salama," ndipo uharibifu unapowapata kwa ghafla, kama uchungu umpatavyo mja mzito, na wala hawataweza kuepa. Lakini ninyi, ndugu, hamwishi gizani. Kwa hiyo siku ile haiwezi kuwashtua ghafla kama mwizi. Maana ninyi nyote mmekuwa wana wa mwanga na wana wa mchana. Hatuna shirika na usiku, wala giza. Kwa hiyo tusilale usingizi kama wengine, bali tukeshe na kuwa na kiasi.
Neno la Bwana.
SHANGILIO LA INJILI
YOHANE 15:4a, 5b
K. Aleluya. W. Aleluya.
K. Dumuni ndani yangu, nami ndani yenu, asema Bwana. Adumuye ndani yangu, huyo huzaa matunda mengi.
W. Aleluya.
INJILI
Mathayo 25:14—30
Wakati ule: Yesu aliwaambia wafuasi wake mfano huu: "Itakuwa hivi: ni kama mtu aliyetaka kusafiri ugenini. Akawaita watumishi wake, akawakabidhi mali zake. Akampa mmoja talanta tano, na mmoja talanta mbili, na mmoja talanta moja, kila mmoja kwa kadiri ya uwezo wake, kisha akasafiri. Mara yule aliyepokea talanta tano, akaenda akazifanyia biashara, akachuma faida talanta nyingine tano. Kadhalika, yule aliyepokea mbili akachuma faida ya nyingine mbili. Lakini yule aliyepokea moja alikwenda, akachimba shimo, akaficha fedha ya bwana wake. Baada ya muda mrefu, bwana wa watumishi wale akaja, akafanya hesabu nao. Akaja yule aliyepokea talanta tano, akaleta talanta nyingine tano akasema, 'Bwana, ulinikabidhi talanta tano. Tazama, talanta nyingine tano nilizopata faida.' Bwana wake akamwambia,, 'Vyema mtumishi mwema, mwaminifu! Kwa sababu ulikuwa mwaminifu kwa machache, nitakuweka juu ya mengi. Ingia katika furaha ya bwana wako.' Kisha akaja yule aliyepokea talanta mbili, akasema, 'Bwana, ulinikabidhi talanta mbili, tazama, nimepata faida ya talanta nyingine mbili.' Bwana wake akamwambia, 'Vyema, mtumishi mwema, mwaminifu! Kwa sababu ulikuwa mwaminifu kwa machache, nitakuweka juu ya mengi. Ingia katika furaha ya bwana wako.' Kisha akaja yule aliyepokea talanta moja, akasema, 'Bwana, nilijua kuwa wewe ni mtu mgumu, wavuna usipopanda, wakusanya usipotawanya. Basi, katika hofu, nikaenda nikaificha talanta udongoni. Hapa unayo iliyo yako.' Bwana wake akajibu, akamwambia, 'Wewe mtumishi mbaya, tena mvivu! Ulijua ya kuwa navuna nisipopanda, nakusanya nisipotawanya. Basi ilikupasa kuweka fedha zangu kwa watu wa benki: na wakati wa kurudi ningalipata iliyo yangu na faida yake pia. Haya, chukueni talanta yake mkampe yule mwenye talanta kumi. Kwa maana kila mwenye kitu atapewa na kuongezewa tele, lakini asiye na kitu, hata kile alichonacho atanyang'nywa. Na mtumishi asiye na thamani, mtupeni nje gizani, ndiko kutakuwako kilio na kusaga meno.'"
Injili ya Bwana.