SOMO 1
Hekima Ya Sulemani 6:1—11
Sikilizeni, basi, enyi wafalme, na mfahamu, jifunzeni, enyi waamuzi wa dunia nzima! Tegeni masikio, enyi mnaotawala wingi wa watu, na mnaojivunia umati wa mataifa! Utawala mlipewa na Bwana na nguvu mlipewa na Aliye Juu, ambaye atachunguza matendo yenu, na kupeleleza mashauri yenu! Kwa maana, ingawa mlikuwa watumishi wa ufalme wake, hamkuenenda kadiri ya mashauri ya Mungu. Yeye atawajia ghafla na kwa kitisho, kwa sababu hukumu kali itawapata wenye mamlaka ya juu. Kwani aliye mdogo kabisa anastahili rehema, lakini wenye madaraka watachunguzwa kwa nguvu. Kwa maana aliye mtawala wa wote hataangalia uso wa mtu, wala hatajali ukubwa, maana yeye mwenyewe aliwafanya mdogo kwa mkubwa, na kuwatunza wote sawa sawa; lakini wenye uwezo inawapasa uchunguzi mkali. Kwenu ninyi, basi, enyi watawala, haya ni maneno yangu mpate kujifunza hekima, wala msianguke. Maana, wale washikao kitakatifu mambo matakatifu, watahesabiwa watakatifu, nao waliofundishwa hayo watapata utetezi. Yatamanini basi maneno yangu; yapendeni na mtapata malezi.
Neno la Bwana.
ZABURI YA KUITIKIZANA
ZABURI 82:3—4, 6—7 (K. 8a)
K. Inuka, ee Mungu, uihukumu nchi.
Mpeni haki mtu dhaifu na yatima,
mpatieni yaliyo haki mnyonge na mdogo.
Waopoeni watu dhaifu na maskini,
waokoeni katika mkono wa mdhalimu. K.
Mimi nimesema, "Ninyi ni miungu,
ninyi wote ni wana wa yule Aliye Juu.
Lakini mtakufa, sawa kama wanadamu,
na kuanguka, sawa kama wakuu." K.
SHANGILIO LA INJILI
1 WATHESALONIKE 5:18
K. Aleluya. W. Aleluya.
K. Katika hali yoyote, mshukuruni Mungu: kwa maana haya ndio mapenzi ya Mungu kwenu katika Kristo Yesu.
W. Aleluya.
INJILI
Luka 17:11—19
Yesu alipokuwa njiani kwenda Yerusalemu, alipita kati ya Samaria na Galilaya. Alipoingia kijiji kimoja watu kumi wenye ukoma walikutana naye. Wakasimama mbali kidogo wakapaza sauti, wakasema, "Yesu, Mwalimu! Utuhurumie!" Alipowaona, akawaambia, "Nendeni, mkajionyeshe kwa makuhani." Tazama, njiani wakatakata. Mmoja wao alipoona ameponywa, akarudi akimtukuza Mungu kwa sauti kubwa; akamwangukia kifudifudi miguuni pake, akamshukuru. Naye alikuwa Msamaria. Yesu akajibu, akasema, "Je, si wote kumi waliotakaswa? Wale tisa wako wapi? Hakupatikana mtu aliyerudi kumpa Mungu heshima ila mgeni huyu?" Akamwambia, "Simama, nenda; imani yako imekuponya."
Injili ya Bwana