SOMO 1
Ezekieli 47:1—9, 12
Siku zile: [Malaika] alinirudisha kwenye maingilio ya nyumba ya hekalu, na tazama, maji yalikuwa yakitoka chini ya kizingiti cha nyumba, upande wa mashariki, kwa maana, nyumba ilielekea mashariki. Maji yalikuwa yakiteremka toka chini ya upande wa kulia wa nyumba, kusini mwa altare. Malaika akanileta nje, kwa njia ya mlango wa kaskazini, akanizungusha kwa njia ya nje mpaka mlango ulio upande wa mashariki; na tazama, maji yalitoka upande wa kulia. Akaniambia, "Maji haya yanakwenda upande wa mashariki, yanateremka katika Araba na kuingia katika bahari na maji yake ya chumvi yatasafishwa. Kila mahali utakapofika mto huu, viumbe vyote vyenye uzima vilivyopo vitaishi; samaki watakuwamo wengi sana. Maji hayo yanapofika, huponya na kuzidisha uzima popote mto upitapo. Kando ya mto, kila ng'ambo, miti ya matunda ya kila namna itaota, na majani yake hayatakauka, wala matunda yake hayatakosekana. Miti itazaa matunda mapya kila mwezi kwa sababu ya maji yale yaliyotokea patakatifu. Nayo matunda yake yatakuwa chakula, na majani yake yatakuwa dawa."
Neno la Bwana.
ZABURI YA KUITIKIZANA
ZABURI 46:2—3, 5—6, , 8—9 (K. 5a)
K. Maji ya mto yaufurahisha mji wa Mungu.
Mungu ni kimbilio na nguvu yetu,
msaada ulio tayari daima wakati wa shida.
Kwa hiyo, hatuogopi hata nchi ikitikisika,
na milima ijapoanguka katikati ya bahari. K.
Mikondo ya mto inaufurahisha mji wa Mungu,
mahali patakatifu pa yule Aliye juu.
Mungu yupo katikati yake, nao hautatikisika;
Mungu huuletea msaada alfajiri na mapema. K.
Bwana wa majeshi yu pamoja nasi,
Mungu wa Yakobo ni ngome yetu.
Njoni,tazameni matendo ya Bwana,
maajabu aliyoyafanya duniani. K.
SOMO 2
1 Wakorintho 3:9c—11, 16—17
Ndugu zangu: Ninyi ni jengo la Mungu. Kwa kadiri ya neema ya Mungu niliyojaliwa nimepata kuwa mjenzi bingwa na nimeweka msingi. Mtu mwingine anajenga juu yake. Lakini yeyote anayejenga juu yake aangalie namna anavyojenga. Maana hakuna anayeweza kuweka msingi mwingine, ila ule uliokwishawekwa, ndiye Yesu Kristo. Je, hamjui ya kuwa ninyi ni hekalu la Mungu, na Roho wa Mungu anakaa ndani yenu? Kama mtu akiliharibu hekalu la Mungu, Mungu atamharibu. Kwa maana hekalu la Mungu ni takatifu, nalo ni ninyi.
Neno la Bwana.
SHANGILIO LA INJILI
2 NYAKATI 7:16
K. Aleluya. W. Aleluya.
K. Nimechagua na kuitakasa nyumba hii, asema Bwana; ili jina langu likae hapa milele.
W. Aleluya.
INJILI
Yohane 2:13—22
Pasaka ya Wayahudi ilikuwa imekaribia. Yesu alipanda kwenda Yerusalemu. Akaona pale hekaluni watu wakiuza ng'ombe, kondoo, na njiwa, pia wabadilisha fedha wamekaa mezani pao. Akafanya mjeledi kwa kamba, akawafukuza wote katika hekalu pamoja na kondoo na ng'ombe. Akamwaga fedha za wabadilisha fedha, akapindua meza zao, akawaambia wauza njiwa, "Ondoeni vitu hivi, msiifanye nyumba ya Baba yangu kuwa nyumba ya biashara." Wafuasi wake wakakumbuka ya kuwa imeandikwa, "Wivu wa nyumba yako unaniua." Hapo Wayahudi wakamrudia na kumwambia, "Je, utaweza kutuonyesha ishara gani inayokuruhusu kufanya hayo?" Yesu akajibu, akawaambia, "Livunjeni hekalu hili, nami nitalijenga tena kwa siku tatu." Wayahudi wakamwambia, "Miaka arobaini na sita ilitakiwa kujenga hekalu hili, na wewe utalijenga kwa siku tatu?" Lakini yeye alikuwa anazungumzia hekalu la mwili wake. Baada ya ufufuko wake katika wafu, wafuasi wake wakakumbuka ya kuwa alisema hayo, n wakayasadiki Maandiko na maneno aliyokuwa ameyasema Yesu.
Injili ya Bwana.