SOMO 1
Warumi 9:1—5
Ndugu: Nasema kweli katika Kristo, sisemi uwongo. Shahidi wangu ni dhamiri yangu inayoongozwa na Roho Mtakatifu: nina huzuni kubwa, na moyo wangu una majonzi daima. Ningependa kulaaniwa na kutengwa na Kristo kwa ajili ya ndugu wenye damu moja nami kama ingewafaa. Hao ni Waisraeli. Kwa hiyo wamejaliwa kuasiliwa, utukufu, agano, kupewa sheria, ibada na ahadi. Mababu ni wao, na hata Kristo ametokea kwao kadiri alivyo mwanadamu, ndiye yeye aliye juu ya yote, Mungu, na kutukuzwa milele. Amina.
Neno la Bwana.
ZABURI YA KUITIKIZANA
ZABURI 147:12—13, 14—15, 19—20 (K. 12a)
K. Umtukuze Bwana, ee Yerusalemu!
Umtukuze Bwana, ee Yerusalemu!
Umsifu Mungu wako, ee Sioni!
Kwani amekaza komeo za malango yako;
amewabariki wana wako ndani yako. K.
Ameweka amani mipakani mwako;
anakushibisha kwa unono wa ngano.
Hupeleka amri yake duniani,
neno lake lapiga mbio sana! K.
Humjulisha Yakobo neno lake;
Israeli amri na kanuni zake.
Hakulitendea taifa jingine lolote lile hayo;
wala hawakuzijua kanuni zake. K.
SHANGILIO LA INJILI
Yohane 10:27
K. Aleluya. W. Aleluya.
K. Kondoo wangu huisikia sauti yangu, asema Bwana; nami nawajua, nao wanifuata.
W. Aleluya.
INJILI
Luka 14:1—6
Siku ya Sabato [Yesu] aliingia nyumba ya mkubwa mmojawapo wa Mafarisayo ale chakula, nao wakawa wakimchunguza kwa makini. Hapo mbele yake palikuwa mtu mwenye ugonjwa wa tumbo la maji. Yesu aliwajibu wanasheria na Mafarisayo akiuliza, "Je, ni halali kuponya siku ya Sabato au sivyo?" Wao wakanyamaza; basi, akamgusa, akamponya, akamruhusu aende zake. Akawaelekea tena wale, akasema, "Nani kati yenu ikiwa mtoto au ng'ombe wake ametumbukia kisimani, hatamtoa mara siku ya Sabato?" Wakashindwa kujibu swali hili.
Injili ya Bwana