RANGI YA KILITURJIA: ZAMBARAU 💜
SOMO LA KWANZA
DANIELI 3:2, 11—20
Utukubali ee Bwana, kwa ajili ya moyo wetu wa toba na roho ya unyenyevu.
Somo katika kitabu cha Nabii Danieli
Siku zile: Azari alisimama [katika moto] akasali sala hii: “Ee Bwana, usituache kabisa, kwa ajili ya jina lako, usilivunje agano lako. Usituondolee huruma yako, kwa ajili ya Abrahamu, rafiki yako, na Isaka mtumishi wako, na Israeli mtakatifu wako, uliowaahidia wana wengi kama nyota za mbinguni, na kama mchanga wa pwani ya bahari. Ee Bwana, sisi tumegeuka kuwa wanyonge kuliko mataifa yote, na kushushwa leo duniani kote sababu ya dhambi zetu. Sasa hatuna tena mkuu, kiongozi wala nabii, wala sadaka ya kuteketezwa, sadaka nyngine, matoleo, wala ubani, wala mahali pa kukutolea matunda na kupata rehema. Lakini tupokelewe nawe kwa moyo wenye kupendeka, na roho yenye kunyenyekea, kama vile tungalikutolea sadaka za kuteketezwa na kondoo na ng’ombe dume, au za wana kondoo wanono maelfu na maelfu. Ndivyo ilivyo sadaka yetu tunakutolea leo, nayo iwe kamilifu mbele yako; maana wale wanaokutumainia wewe, hawataona aibu. Na sasa, sisi tunakufuata na kukuheshimu kwa moyo wote, tunatafuta uso wako, nay a huruma yako kuu. Utukomboe kwa maajabu yako, ukatukuze jina lako, ee Bwana.”
ZABURI YA KUITIKIZANA
25:4—5ab, 6—7bc, 8—9 (K. 6a)
K. Uikumbuke huruma yako, ee Bwana.
Ee Bwana, unionyeshe njia zako,
unifundishe mapito yako.
Uniongoze katika uaminifu wako, unifundishe,
maana wewe ndiwe Mungu mwokozi wangu. K.
Ee Bwana, uikumbuke huruma yako, na rehema zako,
maana ni za tangu milele.
Unikumbuke kwa kadiri ya upendo wako. K.
Bwana ni mwema, tena mwenye haki,
kwa hiyo huwajulisha wakosefu njia zake.
Huwaongoza wanyenyekevu katika haki,
na kuwafundisha njia zake. K.
SHANGILIO LA INJILI
YOELI 2:12—13
W. Sifa na utukufu kwako, ee Kristo.
K. Hata sasa, asema Bwana, mnirudie kwa mioyo yenu yote,
kwa maana mimi ni mpole na mwenye huruma.
W. Sifa na utukufu kwako, ee Kristo.
INJILI
MATHAYO 18:21-35
Msipowasamehe watu makosa yao, wala Baba yenu hatawasamehe ninyi makosa yenu.
Somo la Injili takatifu ilivyoandikwa na Mathayo
Wakati ule: Petro alimwendea Yesu, akasema, “Bwana, ndugu yangu anikosee mara ngapi nami nimsamehe? Hata mara saba?” Yesu akamwambia, “Sikuambii hata mara saba, bali hata saba mara sabini. Kwa hiyo ufalme wa mbinguni umefanana na mfalme aliyetaka kufanya mahesabu na watumishi wake. Alipoanza kufanya mahesabu, walimletea mtu mwenye deni kubwa. Lakini hakuwa na kitu cha kulipa. Kwa hiyo bwana akaamuru auzwe, yeye pamoja na mke na watoto wake na mali yake yote, ili kulipa deni. Hapo yule mtumishi akamwangukia, akamwomba akisema, 'Bwana, unipe muda, nami nitakulipa yote.' Bwana wa mtumishi yule akamhurumia, akamfungua, akamfutia deni. Mtumishi yule akatoka, akamwona mmoja wa watumishi wenzake aliyemdai dinari mia. Akamkamata, akamkaba koo akisema, 'Nilipe haki yangu yote.' Mtumishi mwenzake akamwangukia, akamwomba akisema, 'Unipe muda, nami nitakulipa.' Lakini yule hakutaka, akaenda, akamtupa gerezani mpaka alipe deni. Watumishi wenzake walipoona mambo hayo, walisikitika sana, wakaenda wakamweleza bwana wao yote yalitendeka. Ndipo bwana wake akamwita, akamwambia, 'Ewe mtumishi mbaya, nilikufutia deni lile lote, kwa sababu uliniomba. Je, haikukupasa wewe pia kumsamehe mtumishi mwenzako kama mimi nilivyokusamehe wewe?' Bwana wake akakasirika, akamweka mikononi mwa watesi mpaka alipe deni lote. Hivyo ndivyo na Baba yangu wa mbinguni atawatendea ninyi, msiposamehe kwa moyo, kila mmoja ndugu yake."
INJILI YA BWANA... SIFA KWAKO EE KRISTO