SOMO LA KWANZA
1 Samueli 3:1—10, 19—20
Somo katika kitabu cha kwanza cha Samueli
Siku zile: Kijana Samueli akiwa anamtumikia Bwana mbele ya Eli, neno la Bwana lilikuwa adimu, na mafunuo yalikuwa haba. Ikawa siku moja Eli alipokuwa amelala chumbani mwake na macho yameanza kupofuka, hata asiweze kuona vizuri, taa ya Mungu ikawa haijazimika bado na Samueli amelala katika hekalu la Bwana, pale lilipokuwapo sanduku la Bwana. Bwana akaita: Samueli, Samueli, naye akaitikia, "Mimi hapa!" Naye akamwendea Eli kwa haraka akasema, "Mimi hapa, kwa kuwa uliniita." Eli akasema, "Sikukuita, nenda ukalale." Akaenda kulala. Bwana akaita tena: Samueli, Samueli! Naye akamwendea tena Eli, na kusema, "Mimi hapa, kwa maana uliniita!" Naye akajibu, akasema, "Sikukuita mwanangu, nenda ukalale." Wakati ule Samueli alikuwa bado hajamfahamu Bwana, na neno la Bwana lilikuwa bado kufunuliwa. Bwana akamwita tena Samueli mara ya tatu. Hapo aliamka na kumwendea Eli akasema, "Mimi hapa, kwa maana uliniita." Ndipo Eli akatambua ya kuwa Bwana ndiye aliyekuwa anamwita kijana. Akamwambia Samueli, "Nenda ukalale na utakapoitwa, utasema, 'Nena Bwana kwa kuwa mtumishi wako anasikia.'" Basi akaenda kulala mahali pake. Bwana akaja, akasimama, na kuita kama awali: Samueli Samueli! Ndipo Samueli akaitikia, "Nena Bwana kwa kuwa mtumishi wako anasikia." Samueli akakua, na Bwana alikuwa pamoja naye, wala hakuacha neno lolote lianguke chini. Nao Waisraeli wote toka Dani, mpaka Beer-sheba, walitambua ya kuwa Samueli amewekwa na Bwana kuwa nabii wake.
Neno la Bwana
ZABURI YA KUITIKIZANA
ZABURI 40:2 na 5, 7—8a, 8b—9, 10
K. Tazama, nimekuja, ee Bwana, kuyafanya mapenzi yako.
Nalimngojea Bwana kwa subira,
akanielekea; na kukisikia kilio changu.
Heri mtu aliyemfanya Bwana kuwa tumaini lake,
asiyewafuata wenye majivuno,
wala miungu ya uongo. K.
Hukupenda sadaka wala matoleo,
bali sikio lililo wazi.
Hukutaka dhabihu za kuteketeza wala sadaka za dhambi;
ndipo niliposema, "Tazama, nimekuja." K.
Katika gombo la chuo nimeandikiwa amri zako:
"Napenda kutimiza mapenzi yako,
ee Mungu wangu; sheria yako imo moyoni mwangu!" K.
Nimetangaza habari ya haki yako
katika mkutano mkubwa.
Eala sikuzuia midomo yangu,
ee Bwana, wewe wajua. K.
SHANGILIO LA INJILI
Yohane 10:27
K. Aleluya. W. Aleluya.
K. Kondoo wangu huisikia sauti yangu, asema Bwana; nami nawajua, nao wanifuata.
W. Aleluya.
INJILI
Marko 1:29—39
† Somo la Injili takatifu ilivyoandikwa na Marko
Wakati ule: Yesu alipotoka kwenye sinagogi, alikwenda mara pamoja na Yakobo na Yohane katika nyumba ya Simoni na Andrea. Hapo mkwewe Simoni alikuwa amelala kitandani akishikwa na homa. Mara wakampasha habari ya hali yake. Akamkaribia, akamshika mkono na kumwinua. Mara moja homa ikamwacha na akawatumikia. Ilipofika jioni, baada kuzama jua, walimletea wagonjwa wote na waliopagawa na pepo wabaya. Mji mzima walikusanyika mlangoni pake. Akawaponya wengi waliokuwa na magonjwa mbalimbali. Akatoa pepo wabaya wengi, wala hakuwaruhusu kusema, kwa kuwa walimjua. Asubuhi na mapema, kabla ya kupambazuka, aliamka, akaondoka, na kwenda mahali pa nyika ili kusali. Simoni na wenziwe wakamtafuta na walipomwona, wakasema, "Watu wote wanakutafuta." Akawaambia, "Twendeni mahali pengine katika vijiji vya jirani, nipate kuhubiri huko pia. Hiyo ndiyo nia ya kuja kwangu." Basi alitembea nchi yote ya Galilaya alihubiri katika masinagogi yao na kuwatoa pepo wabaya.
Injili ya Bwana.