SOMO LA KWANZA
Isaya 55:1—11
Somo katika kitabu cha Nabii Isaya
Bwana asema hivi: Enyi wote wenye kiu, njoni penye maji! Hata msipokuwa na fedha, njoni: njoni mnunue nafaka na kula; njoni mnywe divai na maziwa, bila fedha na bila kulipa! Kwanini mnatoa fedha mpate kitu kisicho mkate, kwanini mnatoa jasho mpate kitu kisichoshibisha? Nisikilizeni mimi, mtakula vitramu, na kufurahishwa kwa vyakula vitamu. Tegeni sikio, njoni kwangu; sikilizeni, na roho zenu zitaishi. Nitafanya nayi agano la milele, nitasimika wema wa milele nilimwahidia Daudi. Angalieni, nimemweka awe shahidi kwa makabila, kiongozi na mtawala wa mataifa. Tazama, utaliita taifa usilolijua, na taifa lisilokujua litakukimbilia, kwa sababu ya Bwana, Mungu wako, nay a Mtakatifu wa Israeli aliyekukuza. Mtafuteni Bwana akiwa anapatiakana bado, mwiteni angali yupo karibu. Mtu mbaya aache njia yake, naye mwovu aache mawazo yake; amrudie Bwana atakayemhurumia; Mungu wetu anayesamehe kabisa. Maana mawazo yqangu si mawazo yenu, wala njia zangu si njia zenu – asema Bwana. Kama vile mbingu ziinukavyo juu ya nchi, ndivyo njia zangu ni juu kuliko njia zenu, na mawazo yangu juu kuliko mawazo yenu. Kama vile mvua na theluji zishukavyo kutoka mbinguni, wala hazirudi huko bila kuinywesha ardhi na kuizalisha na kuichipusha, ikampa mtu apandaye mbegu, na mtu alaye chakula, ndivyo litakavyokuwa neno langu, litokalo katika kinywa change; halitanirudia bure, bali litatimiza mapenzi yangu, nalo litafanikiwa katika mambo yale niliyolituma.
Neno la Bwana.
ZABURI YA KUITIKIZANA
ISAYA 12:2—3, 4bcd, 5—6 (K. 3)
K. Kwa furaha mtateka maji kwenye chemchemi za wokovu.
Ndiye Mungu wa wokovu wangu;
namtumainia, wala sina hofu tena.
Kwa kuwa Bwana ni nguvu yangu na wimbo wangu,
amekuwa wokovu wangu.
Nanyi mtateka maji kwa furaha
kwenye chemchemi za wokovu. K.
Mshukuruni Bwana, liiteni jina lake;
tangazeni kati ya mataifa matendo yake makuu,
wakumbusheni ya kuwa jina lake ni tukufu sana. K.
Mwimbieni Bwana, maana ametenda miujiza;
itangazwe duniani kote.
Paza sauti za furaha na shangwe, enyi watu wa Sioni,
maana ametukuzwa ndani yako,
Mtakatifu wa Israeli! K.
SOMO LA PILI
1 Yohane 5:1—9
Somo katika barua ya kwanza ya Mtakatifu Yohane
Wapendwa: Kila asadikiye ya kuwa Yesu ni Kristo, ana asili yake katika Mungu. Na kila ampendaye Baba, ampenda pia aliyezaliwa naye. Tutakuwa na hakika kwamba tunawapenda watoto wa Mungu, tukimpenda Mungu mwenyewe na kuzishika amri zake. Maana kumpenda Mungu ni kuzishika amri zake, na amri zake si nzito. Kwa maana yote yaliyo na asili yake katika Mungu huushinda ulimwengu. Na ushindi ushindao ulimwengu ndiyo imani yetu. Ni nani awezaye kuushinda ulimwengu isipokuwa yeye tu asadikiye ya kuwa Yesu ni Mwana wa Mungu? Ni Yesu Kristo aliyekuja kwa njia ya maji na damu na Roho. Hakuja katika maji tu, bali katika maji na damu pia. Ndiye Roho ashuhudiaye, kwa maana Roho ni ukweli. Basi, kuna watatu hushuhudia neno moja. Ikiwa tunapokea ushuhuda wa wanadamu, basi ushuhuda wa Mungu ni mkubwa zaidi. Ushuhuda wa Mungu ndio huu: amemshuhudia Mwanawe.
Neno la Bwana.
SHANGILIO LA INJILI
TAZAMA YOHANE 1:29
K. Aleluya. W. Aleluya.
K. Yohane alimwona Yesu anakuja kwake, akasema, "Tazameni, Mwanakondoo wa Mungu aondoaye dhambi za ulimwengu."
W. Aleluya.
INJILI
Marko 1:7—11
† Somo la Injili takatifu ilivyoandikwa na Marko
Wakati ule: [Yohane] alihubiri akisema, "Anayekuja baada yangu ni mwenye nguvu kunipita mimi. Kwake sifai hata kuinama na kufungua gidamu ya viatu vyake. Mimi nimewabatiza kwa maji; lakini yeye atawabatiza kwa Roho Mtakatifu." Ikatokea siku zile kuwa Yesu alikuja kutoka Nazareti katika Galilaya, akabatizwa na Yohane katika Yordani. Mara alipotoka kwenye maji, aliona mbingu zinafunguka na Roho akimshukia mfano wa njiwa. Na sauti ikatoka mbinguni, ikisema, Wewe ni Mwanangu mpendwa; ninayependezwa nawe."
Injili ya Bwana.