SOMO LA KWANZA
1 Yohane 3:7—10
Somo katika barua ya kwanza ya Mtakatifu Yohane
Wanangu, asiwadanganye mtu; atendaye uadilifu ni mwadilifu, kama yeye alivyo mwadilifu. Atendaye dhambi ni wa Shetani; kwa maana Shetani ametenda dhambi tangu mwanzo. Kumbe Mwana wa Mungu ametokea, kusudi ayavunje matendo ya Shetani. Kila aliyezaliwa na Mungu hatendi dhambi, kwa sababu mbegu ya Mungu imo ndani yake. Huyo hawezi kutenda dhambi, kwa sababu amezaliwa na Mungu. Watoto wa Mungu na watoto wa Shetani hujulikana hivi; kila asiyetenda maadilifu wala hampendi ndugu yake si wa Mungu.
Neno la Bwana.
ZABURI YA KUITIKIZANA
ZABURI 98:1, 7—8, 9 (K. 3cd)
K. Miisho yote ya dunia imeuona wokovu wa Mungu wetu.
Mwimbieni Bwana wimbo mpya,
kwa maana amefanya mambo ya ajabu,
mkono wake wa kulia,
na mkono wake mtakatifu, umemletea ushindi. K.
Bahari na ivume na vyote viijazavyo,
dunia yote na wote wakaao ndani yake.
Mito na ipige makofi,
milima na iimbe pamoja kwa furaha. K.
Mbele ya Bwana, kwa kuwa anakuja,
kwa kuwa anakuja kuihukumu nchi.
Atauhukumu ulimwengu kwa haki,
na mataifa kwa adili. K.
SHANGILIO LA INJILI
TAZAMA WAEBRANIA 1:1—2
K. Aleluya. W. Aleluya.
K. Mara nyingi na kwa namna nyingi Mungu alisema na mababu zetu kwa njia ya manabii. Siku hizi za mwisho amesema nasi kwa njia ya Mwana.
W. Aleluya.
INJILI
Yohane 1:35—42
† Somo la Injili takatifu ilivyoandikwa na Yohane
Wakati ule: Yohane alisimama tena huko pamoja na wawili wa wanafunzi wake; akamwona Yesu akipita njiani, akasema, "Tazameni you, Mwanakondoo wa Mungu!" Wale wanafunzi wake wawili waliposikia hayo walimfuata Yesu. Yesu akageuka, akawaona wanamfuata, akawauliza, "Mnatafuta nini?" Nao wakajibu, "Rabbi," (inayotafsiriwa, Mwalimu), "Unakaa wapi?" Akawaambia, "Njoni, mtaona." Wakafuatana naye, wakaona, wakashinda kwake siku ile. Ilikuwa saa kumi. Andrea, nduguye Simoni Petro, alikuwa mmoja wa wale wawili waliomsikia Yohane na kumfuata Yesu. Huyo alikutana kwanza na Simoni, nduguye, akamwambia, "Tumemwona Masiya," (inayotafsiriwa, Kristo). Akampeleka kwa Yesu. Yesu akamtazama, akasema, "Wewe u Simoni, mwana wa Yohane; utaitwa Kefa," (inayotafsiriwa, Petro).
Injili ya Bwana.