SOMO LA KWANZA
2 TIMOTHEO 1:1—8
Hayo yanikumbusha imani yako isiyo na unafiki.
Somo katika barua ya pili ya Mtakatifu Paulo kwa Timotheo
Mimi Paulo, kwa kusudio la Mungu Mtume wa Kristo Yesu, kadiri ya ahadi ya uzima unaopatikana katika Kristo Yes, nakusalimu wewe, Timotheo, mwanangu mpendwa: neema, huruma na amani zitokazo kwa Mungu Baba na kwa Kristo Yesu, Bwana wetu, ziwe nawe. Namshukuru Mungu, ambaye namtumikia kwa dhamiri safi kutokana na wazee wangu. Nawe ninakukumbuka daima katika sala zangu usiku na mchana. Nikikumbuka machozi yako ninatamani kuona nipate kujazwa tena furaha. Hayo yanikumbusha imani yako isiyo na unafiki iliyokaa kwanza kwa bibi yako mzee Loisi na mama yako Eunike na, nina hakika, ndani yako pia. Ninakukumbusha, uiamshe neema ya Mungu iliyomo ndani yako kwa kuwekewa mikono yangu. Kwa maana Mungu hakutupelekea roho ya woga, bali Roho wa nguvu na wa upendo na wa kushika kiasi. Basi, usione aibu kumshuhudia Bwana wetu, wala usione aibu kwa sababu yangu mimi niliye mfungwa wake. Bali uvumilie pamoja nami kwa ajili ya Injili ukitegemea nguvu ya Mungu.
NENO LA BWANA... TUMSHUKURU MUNGU
Au somo lifuatalo:
SOMO LA KWANZA
TITO 1:1—5
Tito, mwanangu wa kweli kadiri ya imani tunayoishiriki.
Somo katika barua ya Mtakatifu Paulo kwa Tito
Mimi Paulo, mtumishi wa Mungu na Mtume wa Yesu Kristo, nimeitwa kuwapatia wateule wa Mungu imani na ujuzi wa uchaji wa kweli nikitazamia uzima wa milele, ambao Mungu asiyepitiwa ameuahidi kabla ya nyakati zote. Lakini sasa, wakati wake, amefafanua neno lake katika tangazo nililokabidhiwa mimi kwa agizo la Mungu, Mwokozi wetu. Salamu kwako Tito, mwanangu wa kweli kadiri ya imani moja tunayoishiriki. Neema na amani zitokazo kwa Mungu Baba na kwa Kristo Yesu, Mwokozi wetu, ziwe nawe. Nimekuacha huko Krete kusudi uratibishe yasiyopangwa bado, na uweke wazee wa Kanisa katika kila mji kama nilivyokuagizia.
NENO LA BWANA... TUMSHUKURU MUNGU
ZABURI YA KUITIKIZANA
ZABURI 96:1—2a, 2b—3, 7—8a, 10 (K. 3)
K. Yahubirini maajabu ya Bwana kati ya watu wote.
Mwimbieni Bwana wimbo mpya;
mwimbieni Bwana, nchi yote.
Mwimbieni Bwana, lisifuni jina lake. K.
Siku kwa siku tangazeni wokovu wake.
Uhubirini utukufu wake kati ya mataifa,
maajabu yake, kati ya watu wote. K.
Mpeni Bwana, enyi jamaa za mataifa,
mpeni Bwana sifa na enzi;
mpeni Bwana utukufu wa jina lake! K.
Waambieni mataifa: Bwana ni mfalme.
Amekaza ulimwengu usitikisike,
atawahukumu watu kwa haki. K.
SHANGILIO LA INJILI
LUKA 4:18
K. Aleluya. W. Aleluya.
Bwana amenituma niwahubirie maskini habari njema,
kuwatangazia wafungwa kufunguliwa kwao.
W. Aleluya.
INJILI
LUKA 10:1—9
Mavuno ni mengi, lakini wafanya kazi ni wachache.
† Somo la Injili takatifu ilivyoandikwa na Luka
Wakati ule: Bwana aliweka wengine, sabini na wawili aliowatuma wawili wawili wamtangulie katika kila miji na vijiji vyote alivyotaka kuvitembelea mwenyewe. Akawaambia, "Mavuno ni mengi, lakini wafanyakazi ni wachache; basi, mwombeni Bwana wa mavuno, apeleke wafanyakazi katika mavuno yake. Nendeni; angalieni, nawatuma kama wanakondoo kati ya mbwamwitu. Msichukue mfuko wa fedha, wala mkoba, wala viatu, wala msimsalimie mtu njiani. Kila nyumba mnayoingia, semeni kwanza, 'Amani iwe na nyumba hii.' Na ikiwa mwana wa amani yumo, amani yenu itakuwa juu yake; lakini ikiwa hayumo, amani yenu itarudi kwenu. Kaeni katika nyumba hiyo mkila na kunywa mpewavyo nao, maana mfanyakazi anastahili mshahara wake. Msiende toka nyumba hata nyumba. Mkiingia mjini wanapowapokea, mle mnachoandaliwa, waponyeni wagonjwa waliopo, mkawaambie watu, 'Ufalme wa Mungu umewakaribia.'"
INJILI YA BWANA... SIFA KWAKO EE KRISTO