SOMO LA KWANZA
Mwanzo 22:1—19
Somo katika kitabu cha Mwanzo
Siku zile: Mungu alimjaribu Abrahamu, akamwambia: “Abrahamu!” Naye akaitika, “Mimi hapa!” Mungu akasema: “Umtwae mwanao Isaka, mwanao wa pekee umpendaye, uende katika nchi ya Moria, na huko utamtoa sadaka ya kuteketezwa juu ya mlima nitakaokuonesha.” Walipofika mahali pale alipoambiwa na Mungu, Abrahamu akajenga hapo altare akapanga kuni. Abrahamu akanyosha mkono, akashika kisu amchinje mwanawe. Lakini malaika wa Bwana akamwita toka mbinguni, akasema, “Abrahamu! Abrahamu!” Naye akaitika, “Mimi hapa!” Malaika akasema, “Usimnyoshee mtoto mkono wako! Usimtende neno lolote! Sasa najua ya kuwa unamheshimu Mungu: hukunikatalia mwanao, mwanao wa pekee.” Abrahamu akainua macho, akaona kondoo dume, amenaswa kichakani kwa pembe zake. Abrahamu akaenda akamtwaa kondoo, akamtoa sadaka ya kuteketezwa badala ya mwanawe. Malaika wa Bwana akamwita Abrahamu mara ya pili toka mbinguni, akasema, “Naapa kwa nafsi yangu, asema Bwana: kwa kuwa umefanya jambo hilo, wala hukunikatalia mwanao, mwanao wa pekee, mimi nitakujaza Baraka, nitaufanya uzao wako kuwa mwingi kama nyota za mbinguni na kama mchanga ulioko pwani ya bahari, tena uzao wako utashinda mlango wa maadui wake. Katika uzao wako mataifa yote ya dunia yatajipatia Baraka, kwa sababu umetii sauti yangu.”
Neno la Bwana.
ZABURI YA KUITIKIZANA
Zaburi 116:10 na 15, 16—17, 18—19 (K. 9)
K. Nitatembea mbele za Bwana katika nchi za walio hai.
Niliamini hata niliposema,
"Mimi nimetaabika sana!"
Kina thamani kubwa machoni pa Bwana
kifo cha watakatifu wake. K.
Ee Bwana, hakika mimi ni mtumishi wako,
mimi ni mtumishi wako, mwana wa mjakazi wako;
umevifungua vifungo vyangu.
Nitakutolea dhabihu ya shukrani,
na kuliita jina la Bwana. K.
Nitamtimizia Bwana nadhiri zangu
mbele ya watu wote,
katika nyua za nyumba ya Bwana,
ndani yako, ee Yerusalemu! K.
SOMO LA PILI
Warumi 8:31b—34
Somo katika barua ya Mtakatifu Paulo kwa Warumi.
Ndugu zangu: Kama Mungu yupo upande wetu, ni nani anayeweza kupambana nasi? Yeye asiyekataa kumtoa Mwana wake mwenyewe, bali akamtoa kwa ajili yetu sisi sote, je, huyo akose kutukirimia yote pamoja naye? Ni nani anayeweza kuwashtaki wateule wa Mungu? Ni Mungu anayewapa watu uadilifu. Ni nani anayewahukumu? Kristo Yesu aliyekufa, na zaidi ya hayo: aliyefufuliwa na kuwako kuume kwa Mungu, ndiye yeye anayetuombea.
Neno la Bwana
SHANGILIO LA INJILI
K. Sifa na utukufu kwako, ee Kristo.
K. Sauti ya Baba ikatoka katika wingu lile jeupe ikisema, Huyu ni mwanangu mpendwa, msikilizeni yeye.
W. Sifa na utukufu kwako, ee Kristo.
INJILI
Marko 9:2–10
Somo la Injili takatifu ilivyoandikwa na Marko
Wakati ule: Yesu aliwachukua Petro na Yakobo na Yohane, akawapeleka juu ya mlima mrefu wawe peke yao. Akageuka sura yake mbele yao. Mavazi yake yaling'aa, yakawa meupe sana, jinsi dobi yeyote duniani asivyoweza kuyafanya meupe. Kisha Eliya pamoja na Musa waliwatokea, na walikuwa wakizungumza na Yesu. Petro akamwambia Yesu, "Rabbi, ni vizuri sisi kuwepo hapa. Afadhali tujenge vibanda vitatu, kimoja chako, kimoja cha Musa, na kimoja cha Eliya." Hakujua la kusema, kwa kuwa waliingiwa na hofu nyingi. Kisha wingu likatokea, likawatia kivuli. Sauti ikatoka katika wingu ikisema, "Huyu ni Mwanangu mpendwa, msikilizeni yeye." Mara walipotazama tena, hawakuona mtu ila Yesu peke yake pamoja nao. Waliposhuka mlimani, aliwakataza wasimwambie mtu waliyoyaona mpaka Mwana wa Mtu atakapokuwa amefufuka katika wafu. Wakalishika neno lile, wakajadiliana wao kwa wao maana ya kufufuka katika wafu.
Injili ya Bwana.