SOMO LA KWANZA
Mambo Ya Walawi 13:1—2, 44—46
Bwana aliwaambia Musa na Haruni, akisema: Katika ngozi ya mwili wa mtu, pakitokea kivimbe, upele, au paku linalong'aa, yawezekana ni alama ya ukoma katika mwili wake. Huyo mtu atapelekwa kwa Haruni, kuhani, au kwa mmoja wa wanawe, makuhani. Basi huyo mtu ni mwenye ukoma; yeye ni najisi. Kuhani anapaswa kusema kuwa yu najisi, anao ukoma wa kichwani. Mwenye ukoma aliyepatwa na ugonjwa huo, nguo zake zitararuliwa na nywele za kichwa chake zitaachwa wazi, naye atafunika mdomo wake wa juu na kupiga kelele, "Najisi! Najisi!" Kwa kadiri ugonjwa wake utakavyodumu, yeye atakuwa najisi; yeye yu najisi, atakaa peke yake: makao yake yatakuwa nje ya kambi.
Neno la Bwana.
ZABURI YA KUITIKIZANA
ZABURI 32:1—2, 5, 11 (K. 7)
K. Ndiwe kimbilio langu; wanizungushia furaha ya wokovu.
Heri mtu yule aliyesamehewa kosa,
aliyesitiriwa dhambi yake.
Heri mtu yule ambaye Bwana hamhesabii kosa,
wala moyoni mwake hamna hila. K.
Nilikujulisha dhambi yangu;
wala sikuficha kosa langu.
Nikasema, "Nitamwungamia Bwana uovu wangu,"
nawe ukaondoa ubaya wa dhambi yangu. K.
Mfurahieni Bwana, shangilieni, enyi waadilifu;
shangilieni, enyi wanyofu wa moyo. K.
SOMO LA PILI
1 Wakorintho 10:31—11:1
Somo katika barua ya kwanza ya Mtakatifu Paulo kwa Wakorintho
Ndugu zangu: Mkila au mkinywa au mkitenda lolote, fanyeni yote kwa kumtukuza Mungu. Msiwakwaze Wayahudi wala Wagiriki wala kanisa la Mungu, kama nami ninavyowapendeza wote katika mambo yote. Sitafuti faida yangu, ila faida ya wote, wapate kuokoka. Mniige mimi, kama mimi ninavyomfuasa Kristo.
Neno la Bwana.
SHANGILIO LA INJILI
LUKA 7:16
K. Aleluya. W. Aleluya.
K. Nabii mkubwa ametokea kwetu, na Mungu amewaangalia watu wake.
W. Aleluya.
INJILI
Marko 1:40—45
Somo la Injili takatifu ilivyoandikwa na Marko
Wakati ule: Mtu mwenye ukoma alimjia Yesu, akampigia magoti na kusema, "Ukitaka, waweza kunitakasa." Naye akamhurumia, akanyosha mkono wake, akamgusa na kumwambia, "Nataka, takasika." Mara hapo ukoma ukamtoka, akatakasika. Alipokwisha kumwonya akamwacha aende zake. Na akamwambia, "Angalia, usimweleze mtu chochote, isipokuwa nenda ukajionyeshe kwa kuhani utoe zaka iliyoamriwa na Musa kwa kupona ukoma wako; kusudi iwe ushuhuda kwao." Huyo lakini alitoka, akaanza kutangaza wazi na kulieneza tukio hilo, kiasi kwamba Yesu hakuweza tena kuingia mjini. Basi, akakaa nje mahali pa ukiwa. Hata hivyo watu walimwendea kutoka pande zote.
Injili ya Bwana