SOMO LA KWANZA
1 Wafalme 8:22—23, 27—30
Somo katika kitabu cha kwanza cha Wafalme
Siku zile: Sulemani alisimama mbele ya altare ya Bwana, machoni pa mkutano wa Waisraeli wote, akainyosha mikono yake kuelekea mbinguni, akasema, "Bwana, Mungu wa Israeli, hakuna Mungu kama wewe, mbinguni juu, wala duniani chini; unayashika maagano yako kwa rehema kwa ajili ya watumishi wako wanaoenenda mbele zako kwa mioyo yao yote. Inawezekana kweli kuwa Mungu anakaa kati ya watu, juu ya nchi? Iwapo mbingu hazikutoshi, wala mbingu za mbingu, sembuse nyumba hii niliyojenga! Uyatazame kwa rehema maombi na sala za mtumishi wako, ee Bwana, Mungu wangu, usisikilize sauti na maombi ya mtumishi wako, aombaye leo mbele zako. Macho yako na yalitazame na kulilinda hekalu hili usiku na mchana, mahali hapa ulipopataja, ukisema: Hapa ndipo litakapokuwapo jina langu. Na uyasikilize maombi ya mtumishi wako, na ya watu wako Israeli, wanayokutolea mahali hapa. Uyasikilize huko mbinguni ukaapo, na utujalie msamaha."
Neno la Bwana.
ZABURI YA KUITIKIZANA
Zaburi 84:3, 4, 5 na 10, 11 (K. 2)
K. Maskani yako yapendeza kama nini, ee Bwana wa majeshi!
Nafsi yangu inazitamani nyua za Bwana
hata inataka kuzimia.
Moyo wangu na mwili wangu vinamlilia
Mungu aliye hai. K.
Hata ndege anapata makao,
na mbayuwayu kiota chake cha kuwekea makinda yake,
katika altare zako,
ee Bwana wa majeshi,
Mfalme wangu na Mungu wangu. K.
Heri wale wanaokaa nyumbani mwako,
wakiziimba sifa zako daima.
Ee Mungu uliye ngao yetu,
yageuze macho yako, uangalie;
utazame uso wa mteule wako. K.
Kweli, siku moja katika nyua zako
ni bora kuliko elfu mahali pengine.
Afadhali kukaa mlangoni pa nyumba ya Mungu wangu
kuliko kukaa hemani mwa wenye dhambi. K.
SHANGILIO LA INJILI
Zaburi 119:36a, 29b
K. Aleluya. W. Aleluya.
K. Uelekeze moyo wangu kwenye kanuni zako, unirehemu kwa sheria yako.
W. Aleluya.
INJILI
Marko 7:1—13
Somo la Injili takatifu ilivyoandikwa na Marko
Wakati ule: Mafarisayo na badhi ya waandishi waliokuwa wamefika toka Yerusalemu walikusanyika kwake. Waliona kwamba baadhi ya wafuasi wake walikuwa wanakula mikate kwa mikono najisi, yaani pasipo kutawadha. Kwa maana Mafarisayo na Wayahudi wote walishika sana desturi ya wazee wao wala hawakula kitu kabla ya kunawa mikono. Tena wakitoka sokoni, hawali kitu isipokuwa wanatawadha kwanza. Kuna pia desturi nyingine walizozipokea toka zamani kama kuosha vikombe na sufuria na sahani za shaba na vitanda, kwa hiyo Mafarisayo na Waandishi walimwuliza, "Mbona wafuasi wako hawajali desturi tulizozipokea kwa wazee, bali hula chakula kwa mikono najisi?" Akawajibu, "Enyi wanafiki, ni ninyi aliowataja Isaya katika uaguzi wake alipoandika: 'Watu hawa huniheshimu kwa midomo, lakini mioyo yao iko mbali nami; wananiabudu bure, mafundisho wanayoyafundisha ni amri ya wanadamu tu.' Amri ya Mungu mnaiacha, na kuyashikilia mapokeo ya wanadamu." Akaendelea kusema, "Vema mwaitangua amri ya Mungu mpate kuyashika mapokeo yenu! Maana Musa alisema, 'Waheshimu baba na mama,' tena 'anayemlaani baba au mama, sharti afe.' Bali ninyi husema, 'Mtu akimwambia baba au mama, 'Yoyote kati ya mali yangu ifaayo kukusaidieni ni qorban (yaani imewekwa wakfu), basi, toka pale mnajiondolea wajibu wa kuwasaidia baba na mama zenu. Hivyo, mnalitangua neno la Mungu kwa ajili ya desturi za mapokeo yenu. Mambo mengi kama hayo mwafanya."
Injili ya Bwana.