SOMO 1
1 Yohane 2:12—17
Nawaandikieni enyi watoto, kwa sababu mmesamehewa dhambi zenu kwa ajili ya jina lake. Nawaandikieni, enyi akina baba, kwa sababu mmemjua yeye aliyeko tangu mwanzo. Nawaandikieni, enyi vijana, kwa sababu mmemshinda yule mwovu. Nimewaandikieni, enyi watoto, kwa sababu mmemtambua Baba. Nimewaandikieni, enyi akina baba, kwa sababu mmemjua yeye aliyeko tangu mwanzo. Nimewaandikieni enyi vijana, kwa sababu mna nguvu, na neno la Mungu limo ndani yenu, na mmemshinda mwovu. Msiupende ulimwengu na yaliyo ya ulimwenguni. Aupendaye ulimwengu hana upendo wa Baba ndani yake. Yaliyomo ulimwenguni, ndiyo tamaa ya mwili, tamaa ya macho, na kiburi cha maisha, haya hayatoki kwa Baba, bali yanatoka ulimwenguni. Ulimwengu utapita na tamaa zake, lakini afanyaye atakalo Mungu atadumu milele.
Neno la Bwana.
ZABURI YA KUITIKIZANA
ZABURI 96:7—8a, 8b—9, 10 (K. 11a)
K. Mbingu na zifurahi, nchi na ishangilie.
Mpeni Bwana, enyi Jamaa za Mataifa,
mpeni Bwana sifa na enzi;
mpeni Bwana utukufu wa jina lake! K.
Leteni matoleo, ingieni katika nyua zake,
mwabuduni Bwana kwa fahari ya utakatifu;
tetemeka mbele zake, ee nchi yote. K.
Waambieni mataifa: Bwana ni mfalme.
Amekaza ulimwengu usitikisike,
atawahukumu watu kwa haki. K.
SHANGILIO LA INJILI
K. Aleluya. W. Aleluya.
K. Siku iliyotukuka imetung'aria; njoni, enyi mataifa, na tumwabudu Bwana; kwani leo nuru kuu imeshuka chini duniani.
W. Aleluya.
INJILI
Luka 2:36—40
Wakati ule: Palikuwa na nabii mwanamke, ndiye Anna, binti Fanueli wa kabila la Asheri. Alikuwa mzee sana. Kwanza, baada ya uanawali wake, aliishi na mume wake miaka saba, kisha akawa mjane mpaka kufikia umri wa miaka themanini na minne, alishinda daima hekaluni akimtumikia Mungu kwa kufunga na kusali usiku na mchana. Naye akafika saa ile ile, akamtukuza Mungu na akawasimulia habari zake wote walioutazamia ukombozi wa Yerusalemu. Basi, walipotimiza yote yaliyoamriwa katika sheria ya Bwana, walirudi Galilaya, mjini kwao Nazareti. Mtoto akakua, akaongezeka nguvu, akawa amejaa hekima; na neema ya Mungu ilikuwa juu yake.
Injili ya Bwana.