SOMO 1
1 Yohane 1:5—2:2
Wapendwa: Huu ndio ujumbe tulioupokea kwake Yesu Kristo, na tunaowapasha ninyi: Mungu ni mwanga na hamna giza ndani yake. Tukisema, "Tuna ushirika naye," lakini tungali tunatembea gizani, tunasema uongo, wala hatutembei katika njia ya ukweli. Lakini tukitembea mwangani, kama yeye mwenyewe alivyo mwangani, tuna ushirika sisi kwa sisi, na damu ya Yesu, Mwana wake, inatusafisha na kila dhambi. Tukisema, "Hatuna dhambi," tunajidanganya wenyewe, na ukweli haumo ndani yetu. Lakini tukikiri dhambi zetu, yeye ni mwaminifu, tena mwadilifu, hata atatusamehe dhambi na kutusafisha na kila uovu. Tukisema, "Hatuna dhambi," twamfanya yeye mwongo, na neno lake halimo ndani yetu. Wanangu, hayo nawaandikieni, msije mkatenda dhambi. Lakini kama mtu ametenda dhambi, tunaye mwombezi kwa Baba, ndiye Yesu Kristo mwadilifu. Yeye ndiye upatanisho kwa dhambi zetu, lakini sio kwa dhambi zetu tu, bali kwa dhambi za ulimwengu wote.
Neno la Bwana.
ZABURI YA KUITIKIZANA
ZABURI 124:2—3, 4—5, 7b—8 (K. 7ab)
K. Nafsi zetu zimeponyoka kama ndege katika mtego wa wawindaji.
Kama Bwana asingalikuwa upande wetu,
wanadamu walipotushambulia,
hapo wangalitumeza tungali wazima,
hasira yao ilipotuwakia. K.
Hapo maji yangalituzamisha,
mto ungalipita juu yetu;
maji yangezizamisha nafsi zetu,
kwa wimbi mafuriko. K.
Mtego wao ulivunjwa, nasi tukaokoka.
Msaada wetu u katika jina la Bwana,
aliyeziumba mbingu na nchi. K.
SHANGILIO LA INJILI
K. Aleluya. W. Aleluya.
K. Tunakusifu, ee Mungu; tunakushangilia Bwana; jeshi la Mashahidi waliovalia mavazi meupe linaziimba sifa zako, ee Bwana!
W. Aleluya.
INJILI
Mathayo 2:13—18
Walipoondoka wale mamajusi, tazama, malaika wa Bwana alimtokea Yosefu katika ndoto, akisema, "Amka, umtwae mtoto mchanga na mama yake, ukimbilie Misri. Kaa huko mpaka nitakaposema nawe. Kwa maana Herode ataka kumtafuta mtoto mchanga amwangamize." Alipoamka, alimtwaa mtoto na mama yake usiku, akaondoka kwenda Misri. Akakaa huko mpaka kifo cha Herode. Hivyo neno alilosema Bwana kwa njia ya nabii likatimia, kwamba, "Nalimwita mwanangu kutoka Misri." Basi, Herode alipoona ya kwamba amedanganywa na mamajusi, alikasirika sana. Akatuma watu wawaue katika Bethlehemu na vitongoji vyake vyote, watoto wavulana wote wenye umri wa miaka miwili na chini yake kwa kadiri ya muda aliouhakikisha kutoka kwa mamajusi. Ndipo lilipotimia lile lililosemwa na nabii Yeremia: "Sauti ilisikika Rama, kilio na maombolezo mengi; Raheli akiwalilia watoto wake, asikubali kutulizwa, kwa kuwa hawapo tena."
Injili ya Bwana