SOMO 1
1 Yohane 1:1—4
Wapendwa: Lile lililokuwepo tangu mwanzo, lile tulilolisikia, tuliloliona kwa macho yetu, lile tulilolitazama, na kuligusa kwa mikono yetu, yaani, neno la uzima. Uzima huo ulifanywa uonekane, nasi tumeuona na tunaushuhudia, na tunautangazia kwenu uzima wa milele, ambao uliokuwako kwa Baba, ukatutokea sisi. Basi, tuliyoyaona na kuyasikia, ndiyo tunayowatangazieni, ili ninyi pia mpate kushirikiana na sisi kama sisi tunavyoshirikiana na Baba na Mwana wake Yesu Kristo. Hayo tunayaandika, ili furaha yetu itimizwe.
Neno la Bwana.
ZABURI YA KUITIKIZANA
ZABURI 97:1—2, 5—6, 11—12 (K. 12a)
K. Enyi wenye haki, furahieni katika Bwana.
Bwana ni mfalme; nchi na ishangilie;
visiwa vingi na vifurahi.
Mawingu na giza vyamzunguka Bwana;
hukumu na haki ni msingi wa kiti chake. K.
Milima imeyeyuka kama nta, mbele ya uso wa Bwana,
mbele za Bwana wa dunia yote.
Mbingu zinatangaza haki ya Mungu,
na mataifa yote wameuona utukufu wake. K.
Mwanga unawazukia wenye haki,
na furaha kwa wanyofu wa moyo.
Enyi wenye haki, furahieni Bwana,
mshukuruni mkiukumbuka utakatifu wake. K.
SHANGILIO LA INJILI
K. Aleluya. W. Aleluya.
K. Tunakusifu, ee Mungu; tunakushangilia Bwana; jeshi tukufu la Mitume linaziimba sifa zako, ee Bwana!
W. Aleluya.
INJILI
Yohane 20:2—8
Siku ya kwanza ya juma, Maria Magdalena alipiga mbio, akafika kwa Simoni Petro na yule mfuasi mwingine ambaye Yesu alimpenda, akawaambia, “Wamemwondoa Bwana kaburini, na sisi hatujui walikomweka.” Petro akatoka pamoja na yule mfuasi mwingine kwenda kaburini. Wote wawili walipiga mbio, lakini yule mfuasi mwingine alitangulia, maana alikimbia mbio kuliko Petro, akafika kwanza kwenye kaburi; akainama na kuchungulia, akaviona vitambaa vya sanda vimelala humo, lakini hakuingia. Simoni Petro akaja nyuma yake, akaingia kaburini, akaviona vitambaa vimelala humo, na kadhalika leso ya kufunikia kichwa chake, hiyo imekunjwa, haikulala pamoja na vitambaa vingine, bali peke yake mahali pake. Hapo Yule mfuasi mwingine aliyefika kwanza kaburini akaingia pia, akaona akasadiki.
Injili ya Bwana.