SOMO 1
Isaya 40:25—31
Mtanifananisha na nani? Asema aliye Mtakatifu. Inueni macho yenu juu mtazame ni nani aliyeumba haya yote: aletaye nje jeshi la nyota moja baada ya nyingine na kuziita zote, kila moja kwa jina. Kwa sababu ya nguvu zake kubwa na uwezo wake mkuu, hakuna hata moja inayokosekana! Kwanini unasema, ewe Yakobo, kwanini unanena, ewe Israeli: "Njia yangu imefichama Bwana asiione, haki yangu imempita Mungu wangu asiiangalie?" Je, hujui mambo wala hukusikia neno hili: Bwana ni Mungu tangu milele, yeye ameumba miisho ya dunia. Hazimii, wala hachoki, akili yake haipimiki. Anampa nguvu yule aliyezimia, anamwongezea nguvu yule aliyelegea. Vijana wamechoka na kuzimia, wanaume vijana wanapepesuka sana, lakini wale wanaomtumainia Bwana hupewa nguvu mpya, watapaa juu ya mbawa za tai; hupiga mbio, wala hachoki, watakwenda, wala hawatazimia.
Neno la Bwana.
ZABURI YA KUITIKIZANA
ZABURI 103:1—2, 3—4, 8 na 10 (K. 1a)
K. Umsifu Bwana, ee nafsi yangu.
Umsifu Bwana, ee nafsi yangu;
na yote yaliyo ndani yangu, yalisifu jina lake takatifu!
Umsifu Bwana, ee nafsi yangu;
wala usizisahau fadhili zake zote. K.
Yeye anasamehe dhambi zako zote,
anaponya magonjwa yako yote,
yeye anaukomboa uhai wako na kaburi,
anakuvika taji la fadhili na rehema. K.
Bwana ni mwenye huruma na neema,
hakasiriki upesi, ni mwingi wa fadhili.
Hatutendi kadiri ya dhambi zetu,
wala hatulipi kadiri ya makosa yetu. K.
SHANGILIO LA INJILI
K. Aleluya. W. Aleluya.
K. Tazama, Bwana anakuja kuwakomboa watu wake;
wana heri walio tayari kumlaki.
W. Aleluya.
INJILI
Mathayo 11:28—30
Wakati ule, Yesu akisema: "Njooni kwangu, ninyi nyote msumbukao na kulemewa na mzigo, nami nitawapumzisha. Mjitwike nira yangu na kujifunza kwangu, kwa maana mimi ni mpole na mnyenyekevu wa moyo, nanyi mtazipatia roho zenu raha. Kwani nira yangu si nzito, na mzigo wangu ni rahisi kuuchukua."
Injili ya Bwana.