SOMO 1
Isaya 30:19—21, 23—26
Bwana Mungu Mtakatifu wa Israeli asema hivi: Ewe taifa la Sioni, unayekaa Yerusalemu, hautalia machozi tena. Bwana akisikia kilio chako, atakuhurumia; akikusikia, atakujibu. Bwana atakupa mkate wa taabu, na maji ya usumbufu. Yule anayekufundisha hatajificha tena, nayo macho yako yatamwona mwenye kukufundisha. Masikio yako yatasikia neno wanalosema nyuma yako: "Hii ni njia, uifuate," wala usiende kulia wala kushoto. Atakupa mvua juu ya mbegu ulizopanda udongoni, na mkate; mazao ya nchi, yatakuwa mengi. Makundi yako ya wanyama yatalishwa siku ile katika malisho mapana; ng'ombe na punda wenye kulima watakula chakula kilichokolea chumvi, kilichopepetwa kwa pepeo na ungo. Juu ya kila mlima mrefu, na juu ya kila kilima juu, vitakuwapo vijito na mito. Siku ya mauaji makubwa, minara itakapoanguka. Mwangaza wa mwezi utakuwa kama mwangaza wa jua, nao mwangaza wa jua utaongezeka mara saba, kama mwanga wa siku saba; katika siku ile Bwana atayatibu majeraha ya taifa lake, na kuponya makovu ya vidonda vyake.
Neno la Bwana.
ZABURI YA KUITIKIZANA
ZABURI 147:1—2, 3—4, 5—6 (K. Isaya 30:18)
K. Wana heri wamngojao Bwana.
Jinsi gani ni vema kumwimbia Mungu wetu sifa;
kwa maana kwapendeza, na yastahili kumsifu yeye.
Bwana anaijenga Yerusalemu,
anawakusanya Waisraeli waliotawanyika. K.
Yeye anawaponya waliovunjika moyo,
na kuvitibu vidonda vyao,
ameiweka idadi ya nyota,
anaziita zote kwa jina. K.
Bwana wetu ni mkuu na mwenye nguvu nyingi,
hekima yake haina kikomo.
Bwana huwategemeza wanyonge,
huwaangusha waovu mpaka chini. K.
SHANGILIO LA INJILI
ISAYA 33:22
K. Aleluya. W. Aleluya.
K. Bwana ni mwamuzi wetu, mwanasheria wetu, Bwana ni mfalme na mwokozi wetu.
W. Aleluya.
INJILI
Mathayo 9:35—10:1, 6—8
Wakati ule: Yesu alizunguka katika miji na vijiji vyote akifundisha katika masinagogi yao na kuitangaza Injili ya ufalme. Pia aliponya magonjwa yote na udhaifu wote. Alipouona umati wa watu, aliwahurumia, kwa maana walikuwa wamefadhaika na kutawanyika kama kondoo wasio na mchungaji. Hapo akawaambia wafuasi wake, "Mavuno ni mengi, lakini wafanyakazi ni wachache. Basi, mwombeni Bwana wa mavuno, apeleke wafanyakazi katika mavuno yake." Akawaita wafuasi wake Kumi na Wawili, akawapa uwezo wa kupunga pepo wachafu na kuponya magonjwa yote na udhaifu wote. Akawaambia, "Mwende kwa kondoo waliopotea wa nyumba ya Israeli. Waponyeni wagonjwa, wafufueni wafu, watakaseni wenye ukoma, wafukuzeni pepo wabaya. Mmepata bure, toeni bure."
Injili ya Bwana.