SOMO 1
Mwanzo 3:9—15, 20
[Adamu alipokwisha kula matunda ya mti,] Bwana Mungu alimwita, akamwambia: "Uko wapi?" Mtu akaitika, "Nilisikia kishindo chako katika bustani, nikaogopa kwa kuwa mimi ni uchi, nikajificha." Akamwambia: " Ni nani aliyekuambia ya kuwa u uchi? Basi umekula tunda la ule mti niliokukataza usile!" Mtu akajibu, "Mwanamke uliyemweka kuwa mwenzi wangu ndiye aliyenipa tunda la mti ule, nikala." Bwana Mungu akamwambia mwanamke: "Umefanya nini?" Naye mwanamke akajibu, "Nyoka ndiye aliyenidanganya, nikala." Bwana Mungu akamwambia nyoka: "Kwa kuwa umefanya hayo, ulaaniwe katika wanyama wote, wa kufugwa na wanyama wote wa mwituni; kwa tumbo lako utatambaa, utakula uvumbi siku zote za maisha yako. Nitaweka uadui kati yako wewe na mwanamke, kati ya uzao wako na uzao wake: huyo atakuponda kichwa, nawe utamuuma kisigino cha mguu." Mtu akamwita mkewe jina lake 'Eva,' kwa sababu yeye alikuwa mama wa wazima wote.
Neno la Bwana.
ZABURI YA KUITIKIZANA
ZABURI 98:1, 2—3ab, 3bc—4 (K. 1a)
K. Mwimbieni Bwana wimbo mpya, kwa maana amefanya mambo ya ajabu.
Mwimbieni Bwana wimbo mpya,
kwa maana amefanya mambo ya ajabu.
Mkono wake wa kulia,
na mkono wake Mtakatifu,
umemletea ushindi. K.
Bwana ameujulisha ushindi wake,
mbele ya macho ya mataifa ameifunua haki yake.
Amekumbuka wema na uaminifu wake
kwa nyumba ya Israeli. K.
Miisho yote ya dunia imeuona wokovu wa Mungu wetu.
Mshangilieni Bwana, nchi yote;
pigeni kelele za furaha, imbeni zaburi. K.
SOMO 2
Waefeso 1:3—6, 11—12
Atukuzwe Mungu, Baba wa Bwana wetu Yesu Kristo: yeye ametubariki katika Kristo kwa baraka zote za mbinguni zitokazo kwa Roho Mtakatifu. Katika yeye ametuchagua kabla ya kuwekwa misingi ya ulimwengu, kusudi tuwe watakatifu na bila doa mbele yake katika upendo. Toka mwanzo aliazimia kutufanya watoto wake kwa ajili ya Yesu Kristo, kama alivyotaka kwa mapenzi yake, kusudi tuisifu na kuitukuza neema yake aliyotujalia katika huyo mpendwa. Kwake yeye sisi tumekuwa warithi wake kwa haki. Tumechaguliwa tangu mwanzo kama alivyokusudia yeye afanyaye yote kama yanavyompendeza na anayvyotaka. Ndiyo tumechaguliwa toka mwanzo tuweke matumaini yetu katika Kristo, na hivyo kuwapo kwa sifa na utukufu wake.
Neno la Bwana.
SHANGILIO LA INJILI
TAZAMA LUKA 1:28
K. Aleluya. W. Aleluya.
K. Salamu, Maria, uliyejaa neema!. Bwana yu nawe; umebarikiwa kuliko wanawake wote.
W. Aleluya.
INJILI
Luka 1:26—38
Wakati ule: Malaika Gabrieli alitumwa na Mungu aende katika mji wa Galilaya uitwao Nazareti, kwa mwanamwali bikira, mchumba wa mtu, jina lake Yosefu, wa nyumba ya Daudi, na jina la huyo bikira lilikuwa Maria. Na malaika akaingia kwake akasema,” Salamu, uliyejaa neema! Bwana yu nawe.” Naye akashtuka kwa sababu ya maneno hayo na akawaza maana ya maamkio hayo, na akawaza maana ya maamkio hayo. Malaika akamwambia, ”Usiogope, Maria, kwa maana umebarikiwa na Mungu. Tazama, utachukua mimba na kumzaa mwana wa Aliye juu na Bwana Mungu atampa kiti cha enzi cha Daudi baba yake, ataitawala nyumba ya Yakobo hata milele, na utawala wake hautakuwa na mwisho.” Maria akamwambia malaika, “Litakuwaje neno hili maana sijui mume?” Malaika akamjibu akisema, “Roho mtakatifu atakushukia, na nguvu ya Yule Aliye juu itakufunika kwa kivuli chake. Kwa hiyo kitakatifu kitakachozaliwa kitaitwa Mwana wa Mungu. Hata jamaa yako Elizabeti amepata mimba ya mtoto mwanamume katika uzee wake; na huu ni mwezi wake wa sita kwa yeye aliyeitwa tasa; kwa maana hakuna neno lisilowezekana kwa Mungu” Maria akasema “Tazama, mimi ni mtumishi wa Bwana, nitendewe ulivyonena.” Kisha malaika akamwacha, akaenda zake.
Injili ya Bwana.