SOMO 1
Isaya 26:1—6
Siku ile, wimbo huu utaimbwa katika nchi ya Yuda: "Sisi tunao mji wa nguvu; ili kuulinda, ameweka kuta na boma. Fungueni malango lile taifa lenye kushika haki liingie, taifa lenye kulinda uaminifu. Kwa imara unalinda amani; amani, kwa kuwa taifa lako linakutumainia. Mtumainie BWANA siku zote! Maana BWANA ni Mwamba wa milele. Maana amewashusha waliokalia makao ya juu, mji ulioinuka, ameuangusha mpaka chini, ameusawazisha mpaka mavumbini. Miguu ya wahitaji na nyayo za maskini zinaukanyaga."
Neno la Bwana.
ZABURI YA KUITIKIZANA
ZABURI 118:1 na 8—9 19—21, 25—27a (K. 26a)
K. Mbarikiwa yeye ajaye kwa jina la Bwana.
au: Aleluya.
Mshukuruni Bwana kwa kuwa ni mwema,
kwa maana wema wake ni wa milele.
Ni afadhali kumkimbilia Bwana,
kuliko kumtumainia mwanadamu.
Ni afadhali kumkimbilia Bwana,
kuliko kuwatumainia wakuu. K.
Mnifungulieni malango ya ushindi,
nitaingia na kumshukuru Bwana.
Huu ndio mlango wa Bwana,
watu waadilifu wataingia humo.
Nitakushukuru kwa kuwa umenisikiliza,
nawe umekuwa wokovu wangu. K.
Ee Bwana, tunakusihi, utuokoe!
Ee Bwana, tunakusihi, utufundishe!
Mbarikiwa yeye ajaye / kwa jina la Bwana.
Tunawabariki ninyi toka nyumba ya Bwana.
Bwana ni Mungu, naye ametuangazia. K.
SHANGILIO LA INJILI
ISAYA 55:6
K. Aleluya. W. Aleluya.
K. Mtafuteni Bwana angali anapatikana, mwiteni angali bado yu karibu.
W. Aleluya.
INJILI
Mathayo 7:21, 24—27
Wakati ule: Yesu aliwaambia wafuasi wake, "Si kila mtu aniambiaye, 'Bwana, Bwana,' atakayeingia katika ufalme wa mbingu; bali yeye afanyaye atakayo Baba yangu aliye mbinguni. Basi, kila ayasikiaye maneno yangu na kuyafanya, afanana na mtu mwenye busara aliyejenga nyumba yake juu ya mwamba. Mvua ikanyesha, mafuriko yakaja, pepo zikavuma, zikaishambulia nyumba ile, lakini haikubomoka, kwa kuwa msingi wake umewekwa mwambani. Tena kila ayasikiaye hayo maneno yangu asiyafuate, atafanana na mpumbavu aliyejenga nyumba yake juu ya mchanga. Mvua ikanyesha, mafuriko yakaja, pepo zikavuma, zikaishambulia nyumba ile, ikabomoka, na anguko lake likawa kubwa."
Injili ya Bwana.