SOMO 1
Isaya 11:1—10
Siku ile: Chipukizi litatokea katika shina la Yese, kitawi kitaota katika mizizi yake. Juu yake itakaa roho ya BWANA, roho ya hekima na ufahamu, roho ya shauri na nguvu, roho ya elimu na kumcha BWANA. Na Furaha yake itakuwa katika kumcha BWANA. Hatakata shauri kadiri ya mtazamo, bali, atawaamua wanyonge kwa haki kamili, atawapatia maskini wa nchi hukumu sawa. Neno lake litakuwa fimbo ya kuipiga nchi, pumzi ya midomo yake itamwua mwovu. Haki itakuwa ukanda was viuno vyake, uaminifu utakuwa ukanda wake WA kujifungia. Mbwamwitu atakaa pamoja na mwanakondoo, chui atalala karibu na mwanambuzi; ndama na mwanasimba watakuwa pamoja, mtoto mdogo atawachunga. Ng'ombe na dubu jike watakula pamoja, wana wao watalala pamoja; simba atakula majani kama ng'ombe. Mtoto mchanga atacheza penye tundu la nyoka, na juu ya shimo la firi mtoto atatia mkono wake. Uovu hautatendeka tena wala uharibifu, juu ya mlima wangu wote mtakatifu; maana nchi yote itajaa elimu ya BWANA, sawa kama maji yanavyojaza bahari. Itakuwa katika makabila watalitafuta; kikao chake kitakuwa na utukufu.
Neno la Bwana.
ZABURI YA KUITIKIZANA
ZABURI 72:2, 7—8, 12—13, 17
K. Njoo, Bwana, mfalme wa haki na amani.
Ee Mungu, umpe mfalme hukumu yako,
na mwana wa mfalme haki yako;
ahukumu taifa lako kwa haki,
na wanyonge kwa usawa. K.
Katika siku zake haki iendelee,
na amani izidi mpaka mwezi ukome.
Atawale toka bahari hata bahari,
na toka ule mto hata miisho ya dunia. K.
Maana atamkomboa maskini mwenye kumlilia,
na mnyonge asiye na msaidizi.
Atamhurumia dhaifu na mhitaji,
ataziokoa nafsi za wahitaji. K.
Jina lake lidumu milele;
kumbukumbu yake idumu pindi liangazapo jua.
Watu wa mataifa yote watabarikiwa katika yeye;
na watamwita mwenye heri. K.
SHANGILIO LA INJILI
K. Aleluya. W. Aleluya.
K. Tazama, Bwana wetu atakuja na uweza, naye atayatia nuru macho ya watumishi wake.
W. Aleluya.
INJILI
Luka 10:21—24
Saa ile ile Yesu alishangilia katika Roho Mtakatifu, akasema, "Nakushukuru, Baba, Bwana wa mbingu na nchi, kwa kuwa umeyaficha haya kwa wenye elimu na busara, ukayafunua kwa watoto wachanga. Ndivyo, Baba, ilivyokupendeza. Yote nimekabidhiwa na Baba yangu. Hakuna amjuaye Mwana ni nani ila Baba, wala hakuna amjuaye Baba ni nani ila Mwana na yeyote ambaye Mwana apenda kumfunulia." Akawageukia wafuasi wake, akasema nao kwa faragha, "Yenye heri macho yaonayo mnayoyaona ninyi. Kwa maana nawaambieni, manabii na wafalme walitaka kuona mnayoyaona ninyi, wasiyaone, na kusikia mnayoyasikia, wasiyasikie."
Injili ya Bwana.