SOMO 1
Danieli 7:2—14
Mimi, Danieli, nimeona njozi usiku, ghafla pepo nne za mbingu ziliichafua bahari kuu, na wanyama wanne wakubwa mno wakatoka baharini, wote wa namna mbalimbali. Yule wa kwanza alikuwa kama simba, naye alikuwa na mbawa za tai. Nilipotazama, mbawa zake ziling'olewa, naye akainuliwa katika nchi akasimamishwa juu ya miguu yake kama mwanadamu, akapewa moyo wa mwanadamu. Na tazama, mnyama mwingine, yule wa pili, alikuwa amefanana na dubu; naye aliinuliwa juu ya upande mmoja, alikuwa na mifupa mitatu ya mbavu kinywani mwake, katika meno yake. Akaaambiwa, "Simama, ule nyama tele." Baadaye nikaangalia, na tazama, mnyama mwingine, aliyekuwa kama chui; na mwenye mbawa nne za ndege mgongoni. Mnyama huyo alikuwa na vichwa vinne naye akapewa utawala. Baadaye nikaangalia katika maono yangu ya usiku, na tazama, mnyama wa nne, aliyekuwa mwenye kutisha na kuogofya na mwenye nguvu kubwa ajabu; alikuwa na meno makubwa ya chuma, alikula na kuponda, akakanyaga kwa miguu yale yaliyobaki. Alikuwa wa namna tofauti na wanyama wote waliomtangulia. Naye alikuwa na pembe kumi. Nikaangalia zile pembe, na tazama, pembe nyingine iliyo ndogo ikaota katikati ya zile pembe, na pembe tatu kati ya hizo zikang'olewa mbele yake. Na tazama, katika ile pembe mlikuwa na macho kama macho ya mwanadamu, tena kinywa chenye kusema maneno ya kiburi. Huku nikiangalia, viti vya enzi vikawekwa, na Mzee wa Kale akaketi. Vazi lake lilikuwa jeupe kama theluji, na nywele za kichwa chake kama sufu safi; kiti chake cha enzi kilikuwa ndimi za moto, na magurudumu yake moto wenye kuwaka. Mto wa moto ulitiririka na kutoka mbele yake; maelfu na maelfu walimtumikia, na milioni na milioni walisimama bila hatia mbele yake. Wenye kuhukumu barazani wakaketi, vitabu vikafunguliwa. Hapo nikaangalia, nikasikia sauti ya maneno ya kiburi yaliyosemwa na ile pembe. Nikaangalia, yule mnyama akauawa, na mwili wake ukateketezwa na kuchomwa katika moto wenye kuwaka. Wanyama wengine wakaondolewa utawala wao, lakini wakapewa ongezo la maisha yao, kwa wakati na muda uliowekwa. Nikaangalia katika maono yangu ya usiku, na tazama, mmoja kama mwana wa mtu akaja katika mawingu ya mbingu, akaendelea mpaka akamfikia yule Mzee wa Kale, akakaribishwa mbele yake. Akapewa utawala, utukufu na ufalme: watu wa makabila yote na mataifa yote na lugha zote wakamtumikia. Utawala wake ulikuwa utawala wa milele na usiopita, na ufalme wake hautaangamizwa.
Neno la Bwana.
ZABURI YA KUITIKIZANA
DANIELI 3:53, 54, 55, 56, 57, 58, 59 (K. 53b)
K. Msifuni na kumtukuza milele.
Enyi milima na vilima, mtukuzeni Bwana;
msifuni na kumtukuza milele. K.
Enyi mimea yote ichipukayo katika nchi, mtukuzeni Bwana,
msifuni na kumtukuza milele. K.
Enyi chemchemi, mtukuzeni Bwana,
msifuni na kumtukuza milele. K.
Enyi bahari na mito, mtukuzeni Bwana,
msifuni na kumtukuza milele. K.
Enyi nyangumi na vyote vitembeavyo majini, mtukuzeni Bwana,
msifuni na kumtukuza milele. K.
Enyi nyote ndege wa angani, mtukuzeni Bwana,
msifuni na kumtukuza milele. K.
Enyi nyote wanyama wa porini na wafugwao, mtukuzeni Bwana,
msifuni na kumtukuza milele. K.
SHANGILIO LA INJILI
LUKA 21:28
K. Aleluya. W. Aleluya.
K. Tazameni juu, viinueni vichwa vyenu, kwa maana ukombozi wenu umekaribia.
W. Aleluya.
INJILI
Luka 21:29—33
Wakati ule: Yesu aliwaambia wafuasi wake mfano, "Utazameni mtini na miti mingine yote. Inapoanza kuchipuka, mwaona na kutambua ya kuwa wakati wa mvua ni karibu. Kadhalika ninyi mnapoyaona mambo hayo yakitendeka, tambueni ya kuwa ufalme wa Mungu upo karibu. Amin, nawaambieni, kizazi hiki hakitapita hata hayo yote yatimie. Mbingu na dunia zitapita, lakini maneno yangu hayatapita."
Injili ya Bwana.