RANGI YA KILITURJIA: ZAMBARAU š
SOMO LA KWANZA
YEREMIA 7:23ā28
Taifa hili ndilo lisilosikiliza sauti ya Bwana, Mungu wao.
Somo katika kitabu cha Nabii Yeremia
Bwana Mungu asema hivi: "Niliwaamuru hasa neno hili: Sikilizeni sauti yangu; nami nitakuwa Mungu wenu, nanyi mtakuwa taifa langu. Mtakwenda katika njia ile yote nitakayowaamuru, mpate kufanikiwa. Lakini hawakunisikiliza, wala kutega sikio. Walifuata hamu zao kwa ushupavu wa mioyo yao mibaya, wakanionyesha mgongo, sio uso. Tangu siku ile baba zenu walipotoka katika nchi ya Misri mpaka siku ya leo, nimewatuma watumishi wangu wote manabii waende kwenu asubuhi na jioni. Lakini hawakunisikiliza wala kutega masikio, bali walizidi kushupaa na kufanya shingo zao kuwa ngumu; walitenda mabaya kuliko baba zao. Nawe utawaambia maneno hayo yote lakini hawatakusikiliza. Utawaita, lakini hawatakuitikia. Basi, utawaambia: Taifa hili ndilo lisilosikiliza sauti ya Bwana, Mungu wao, wala kupokea mafundisho. Uaminifu umepotea; umefutwa katika vinywa vyao."
NENO LA BWANA... TUMSHUKURU MUNGU
ZABURI YA KUITIKIZANA
ZABURI 95:1ā2, 6ā7abc, 7dā9 (K. 7dā8a)
K. Ingekuwa heri leo msikie sauti yake; msiifanye mioyo yenu kuwa migumu.
Njoni, tumwimbie Bwana kwa furaha,
tumshangilie mwamba wa wokovu wetu.
Tuje mbele zake kwa shukrani,
tumfanyie shangwe kwa nyimbo na zaburi. K.
Njoni, tuabudu na tusujudu;
tupige magoti mbele za Bwana aliyetuumba.
Kwani yeye ni Mungu wetu,
nasi tu watu wa malisho yake,
Na kondoo wanaochungwa kwa mikono yake. K.
Ingekuwa heri leo msikie sauti yake:
msiifanye migumu mioyo yenu kama huko Meriba,
Kama vile huko Meriba,
kama siku za Masa jangwani. / Waliponijaribu baba zenu;
ingawa walikwishaona matendo yangu. K.
SHANGILIO LA INJILI
YOELI 2:12ā13
W. Sifa na utukufu kwako, ee Kristo.
K. Hata sasa, asema Bwana, mnirudie kwa mioyo yenu yote, kwa maana mimi ni mpole na mwingi wa huruma.
W. Sifa na utukufu kwako, ee Kristo.
INJILI
LUKA 11:14ā23
Yeye asiye pamoja nami yu dhidi yangu.
Somo la Injili takatifu ilivyoandikwa na Luka
Wakati ule: Yesu alimpunga pepo mbaya aliyekuwa bubu, nana baada ya kutoka pepo mbaya, bubu akanena na umati wa watu walishangaa. Baadhi yao wakisema, "Kwa msaada wa Belzebuli, mkuu wa pepo wabaya, huwapunga pepo wabaya." Tena, wengine walimjaribu, wakitaka kuonyeshwa ishara kutoka mbinguni. Naye akajua mawazo yao, akawaambia, "Kila ufalme usiopatana wenyewe kwa wenyewe utaangamizwa, na nyumba itabomokea nyumba. Basi, ikiwa Shetani hapatani naye mwenyewe, ufalme wake utawezaje kuduma? Maana mwasema kwamba nawafukuza pepo wabaya Kwa msaada wa Belzebuli. Ikiwa mimi nawafukuza pepo wabaya kwa msaada wa Belzebuli, je, wana wenu huwafukuza kwa msaada wa nani? Ndiyo maana hao watakuwa mahakimu wenu. Lakini ikiwa nawafukuza pepo wabaya kwa kidole cha Mungu, hakika ufalme wa Mungu umekwisha kuwafikia. Mwenye nguvu anapoilinda nyumba yake kwa silaha, malo yake yote ni salama. Lakini mwenye nguvu nyingi zaidi kuliko yeye akimshambulia na kumshinda, anamnyang'anya silaha zake zote alizotegemea, na kugawanya nyara zake. Asiye pamoja nami yu dhidi yangu; asiyekusanya pamoja nami hutapanya."
INJILI YA BWANA... SIFA KWAKO EE KRISTO