RANGI YA KILITURJIA: KIJANI KIBICHI 💚SOMO LA KWANZA
1 WAFALME 2:1—4, 10—12
Mimi nimekaribia kwenda njia ya walimwengu wote. Uwe na moyo hodari na ujionyeshe kuwa mwanamume!
Somo katika kitrabu cha kwanza cha Wafalme
Siku ya kufa kwake Daudi ilipokaribia, alimpa Sulemani mwanaye wosia: “Mimi ninaenda njia ya walimwengu wote. Uwe na moyo hodari na ujionyeshe kuwa mwanamume! Uyashike mausia ya Bwana, Mungu wako, uende katika njia zake, ukizishika sharia zake, na amri zake, hukumu zake na maagizo yake sawa na jinsi yalivyoandikwa katika Torati ya Musa, ili ustawi na kufanikiwa katika yote utakayotenda na uyatazamayo, na ili Bwana atimize neno lile alilonena juu yangu: “Ikiwa wanao wataiangalia njia yao, wakienda katika njia zangu kwa uaminifu, kwa moyo wao wote na kwa roho zao zote, kizazi chako hakitakosekana katika kiti cha ufalme wa Israeli.” Basi Daudi akalala na baba zake, na akazikwa katika mji wa Daudi. Nao muda aliotawala juu ya Israeli ulikuwa miaka arobaini. Alitawala huko Hebroni kwa miaka saba, na katika Yerusalemu akatawala kwa miaka thelathini na mitatu. Basi Sulemani akaketi katika kiti cha enzi cha Daudi baba yake, nao ufalme wake ulikuwa imara.
NENO LA BWANA… TUMSHUKURU MUNGU
ZABURI YA KUITIKIZANA
1 MAMBO YA NYAKATI 29:10b, 11ab, 11—12a, 12bcd (K. 12b)
K. Ee Bwana, unatawala juu ya vyote.
Utukuzwe, ee Bwana,
Mungu wa Israelui Baba yetu,
milele hata milele. K.
Ukuu ni wako, ee Bwana, na uweza,
na utukufu, na kushinda na enzi;
maana vitu vyote vilivyo mbinguni na duniani ni vyako. K
.
Nawe umetukuzwa, u mkuu juu ya vitu vyote.
Utajiri na heshima hutoka kwako. K.
Nawe unatawala juu ya yote.
Na mkononi mwako mna uweza na nguvu;
tena mkononi mna kuwatukuza na kuwawezesha wote. K.
SHANGILIO LA INJILI
MARKO 1:15
K. Aleluya. W. Aleluya.
K. Ufalme wa Mungu umekaribia. Tubuni na kuiamini Injili.
W. Aleluya.
INJILI
MARKO 6:7—13
Alianza kuwatuma kuhubiri.
† Somo la Injili takatifu ilivyoandikwa na Marko
Wakati ule: Yesu aliwaita wale Kumi na Wawili, akaanza kuwatuma kuhubiri wawili wawili na akawapa uwezo wa kupunga pepo wachafu. Akawaagiza wasichukue kitu njiani, wala mkate, wala mkoba, wala pesa pindoni, ila fimbo ya safari. Wavae viatu, lakini wasivae kanzu mbili. Tena aliwaambia, “Mnapoingia katika nyumba Fulani, kaeni humo mpaka mtakapohama. Wasipowapokea na wakikataa kuwasikiliza, ondokeni pale na kung’uteni mavumbi kutoka miguuni mwenu kwa kuwasuta.” Basi, walitoka, wakahubiri watu watubu. Walitoa pepo wengi, pia walipaka wagonjwa wengi mafuta, wakawaponya.
INJILI YA BWANA… SIFA KWAKO EE KRSITO