MASOMO YA MISA
RANGI YA KILITURJIA: KIJANI KIBICHI 💚
SOMO LA KWANZA
YEREMIA 31:—1—7
Nimekupenda kwa upendo usio na kikomo.
Somo katika kitabu cha Nabii Yeremia
Siku zile - asema Bwana, nitakuwa Mungu wa makabila yote ya Israeli, nao watakuwa taifa langu." Bwana amesema hivi: " Watu wale waliopona katika upanga wamepata neema jangwani. Israeli analiendea pumziko lake. Bwana alinitokea kwa mbali, akasema: Nimekupenda kwa mapendo ya milele: ndiyo maana nimekuongezea uaminifu wangu. Nitakujenga tena, nawe utajengwa, ee bikira wa Israeli; utafurahi tena kwa matari yako ya sikukuu, utatoka tena na wenye kucheza ngoma kwa shangwe. Utapanda tena mizabibu katika milima ya Samaria: wenye kupanda watavuna matunda yake. Maana siku inakuja, ambapo walinzi watalia katika milima ya Efraimu: Haya, inukeni, tupande kwenda Sioni, tumwendee Bwana, Mungu wetu.'" Maana Bwana amesema hivi: "Imbeni kwa sauti za furaha kwa ajili ya Yakobo, lishangilieni taifa lililo la kwanza; tangazeni, sifuni, mseme: Bwana ameokoa taifa lake, ndio wale waliobaki katika Israeli.
NENO LA BWANA... SIFA KWAKO EE KRISTO
ZABURI YA KUITIKIZANA
YEREMIA 31:10, 11—12ab, 13 (K. 10d)
K. Bwana atatulinda kama mchungaji alilindavyo kundi lake.
Enyi mataifa, lisikieni neno la Bwana,
Iitangazeni katika visiwa vya mbali.
Semeni: aliyemtawanya Israeli atamkusanya,
atamlinda kama mchungaji alindavyo kundi lake. K.
Kwa maana Bwana atamwokoa Yakobo,
atamwopoa katika mkono wa mtu mwenye nguvu kumpita yeye.
Watakuja na kupaza sauti kwa shangwe juu ya Mlima Sioni,
wataukimbilia wema wa Bwana. K.
Hapo binti watafurahi kwa kucheza ngoma,
na vijana na wazee vile vile.
Nitageuza huzuni yao kuwa changamko,
nitawatuliza na kuwafurahisha baada ya mateso yao. K.
SHANGILIO LA INJILI
LUKA 7:16
K. Aleluya. W. Aleluya.
K. Nabii mkubwa ametokea kwetu, na Mungu amewatembelea watu wake.
W. Aleluya.
SOMO LA INJILI
MATHAYO 15:21—28
Mama, imani yako ni kubwa!
†Somo la Injili takatifu ilivyoandikwa na Mathayo
Wakati ule: Yesu aliondoka huko aende katika sehemu za Tiro na Sidoni. Hapo mwanamke Mkananayo alikuja kutoka eneo lile, akaita kwa sauti kubwa, "Unihurumie, Bwana, Mwana wa Daudi. Binti yangu anasumbuliwa sana na pepo mbaya." Lakini hakumjibu neno. Wafuasi wake wakamwendea, wakamwomba wakisema, Mwache aende zake, kwa maana anatufuata kwa kelele." Akajibu, "Nimetumwa kwa kondoo wapotevu wa nyumba ya Israeli tu." Naye akaja, akamsujudia, akasema, "Bwana, unisaidie." Akamjibu, "Si vizuri kuchukua chakula cha watoto na kuwatupia vijibwa." Naye akasema, "Ndiyo, Bwana, lakini hata vijibwa hula makombo yaangukayo katika meza za bwana wao." Hapo Yesu akajibu, akamwambia, "Mama, imani yako ni kubwa! Utendewe kama utakavyo." Tangu saa ile binti yake akawa mzima.
INJILI YA BWANA... SIFA KWAKO EE KRISTO