SOMO 1
Wimbo Ulio Bora 2:8—14
Haya! Mpendwa wangu — anakuja akinepa kupitia milimani, mwendo wake wa mbio milimani, anaruka vilimani. Mpendwa wangu ni kama paa, au kama swala. Nimemwona! Anasimama nyuma ya kiambaza, anachungulia dirishani, anapeleleza mlangoni. Mpendwa wangu ameanza kunena, ananiambia, "Simama, wewe mpendwa wangu, uliye mzuri uje! Tazama, wakati wa baridi umepita, masika imekwisha, imeondoka. Maua yametokea katika nchi, wakati wa nyimbo umefika, sauti ya njiwa imesikika katika nchi yetu, mtini umetoa maua yake, mizabibu imechanua na kutoa harufu yake nzuri. Simama, wewe, mpendwa wangu, uliye mzuri sana, njoo! Ewe, njiwa wangu, umejificha katika ufa wa mwamba, katika shimo la mawe. Ee, unionyeshe uso wako, nisikie sauti yako, sauti yako tamu, na uso wako mzuri."
Neno la Bwana.
au somo lifuatalo:
SOMO 1
Sefania 3:14—28a
Piga kelele za furaha, ewe binti Sioni; piga kelele za shwange, ewe Israeli; furahi na shangilia kwa moyo wote, ewe binti Yerusalemu. Bwana ameondoa hukumu iliyokuwa juu yako, amefukuza adui yako. Bwana, Mfalme wa Israeli yupo ndani yako, wala hutaona msiba tena. Katika siku ile Yerusalemu utaambiwa: "Usiogope, ee Sioni, mikono yako isilegee. Bwana Mungu wako yupo katikati yako, shujaa aokoaye. Atakufurahia kwa furaha kuu, atakulilia katika upendo wake. Atakufurahia kwa kuimba."
Neno la Bwana.
ZABURI YA KUITIKIZANA
ZABURI 33:2—3, 11—12, 20—21 (K. 1a, 3a)
K. Mshangilieni Bwana, enyi wenye haki;
mwimbieni wimbo mpya.
Mtukuzeni Bwana kwa kinubi,
mpigieni kinanda cha nyuzi kumi.
Mwimbieni wimbo mpya,
pigeni vizuri kwa sauti za shangwe. K.
Shauri la Bwana ladumu milele,
makusudi ya moyo wake kizazi hata kizazi.
Heri taifa ambalo Bwana ni Mungu wake,
kabila alilochagua kuwa urithi wake. K.
Nafsi zetu zinamngoja Bwana,
yeye ndiye msaada wetu na ngao yetu.
Naam, mioyo yetu inamfurahia,
maana twatumainia jina lako takatifu. K.
SHANGILIO LA INJILI
K. Aleluya. W. Aleluya.
K. Ee Emanueli, Mfalme wetu na mtoa sheria, njoo utuokoe, ee Bwana Mungu wetu.
W. Aleluya.
INJILI
Luka 1:39—45
Siku zile, Maria alifunga safari, akaenda hima sehemu ya milimani hata akafikia mji mmoja wa Yuda, akaingia nyumbani kwa Zakaria, akamwamkia Elizabeti. Hapo Elizabeti aliposikia maamkio ya Maria, kitoto kichanga kikaruka tumboni mwake. Naye Elizabeti akajazwa Roho Mtakatifu, akapaza sauti, akasema, "Umebarikiwa kuliko wanawake wote, na mzao wa tumbo lako amebarikiwa. Kutoka wapi imenifikia heshima ya kutembelewa na mama wa Bwana wangu? Maana sauti ya maamkio yako ilipoingia masikioni mwangu, kitoto kichanga kikaruka kwa furaha ndani ya tumbo langu. Naye ana heri aliyesadiki ya kwamba ahadi aliyoambiwa na Bwana itatimia."
Injili ya Bwana.