SOMO 1
Yoshua Bin Sira 48:1—4, 9—11
Siku zile: Aliinuka Nabii Eliya, kama moto, na neno lake lilikuwa likiwaka kama mwenge. Ambaye alileta njaa kubwa juu yao, na kwa wivu wake aliwafanya kuwa wachache. Akazifunga mbingu kwa neno la Mungu, hali kadhalika akashusha moto mara tatu. Jinsi ulivyo mtukufu, ee Eliya, katika maajabu yako! Na ni nani awezaye kujisifu kuwa sawa nawe? Ulichukuliwa katika kisulisuli cha moto, kwa gari la farasi wa moto. Umeandikiwa kwa maonyo ya nyakati, ili kukomesha hasira kabla ya siku ya Bwana. Kurudisha moyo wa baba kwa mwana, na kutengeneza makabila ya Yakobo. Wana heri waliokuona, kabla ya kulala.
Neno la Bwana.
ZABURI YA KUITIKIZANA
ZABURI 80:2ac na 3b, 15—16, 18—19
K. Ee Bwana, utuangazishie uso wako, nasi tutaokoka.
Ewe mchungaji wa Israeli, usikilize,
unayeketi juu ya makerubi ujionyeshe,
uamshe nguvu zako kuu, uje,
utusaidie tuwe salama. K.
Ee Mungu wa majeshi, urudi;
uangalie toka mbinguni, uone;
uje kuutazama mzabibu wako,
mche ulioupanda kwa mkono wako wa kulia. K.
Msaada wako na uwe juu ya mtu aliye mkono wako wa kulia,
juu ya mwanadamu uliyemtia nguvu kwa ajili yako.
Basi hatutakuacha tena kamwe;
utatuhuisha tena, nasi tutaliitia jina lako. K.
SHANGILIO LA INJILI
LUKA 3:4, 6
K. Aleluya. W. Aleluya.
K. Itengenezeni njia ya Bwana, yanyosheni mapito yake;
na watu wote wenye mwili watauona wokovu wa Mungu wetu.
K. Aleluya.
INJILI
Mathayo 17:10—13
Waliposhuka kutoka mlimani, wafuasi walimwuliza Yesu, "Basi, kwanini Waandishi husema ya kwamba imempasa Eliya kuja kwanza?" Naye akajibu, akawaambia, "Kweli, Eliya anakuja kutengeneza yote; lakini nawaambieni, Eliya amekwisha kuja, isipokuwa hawakumtambua, bali walimtendea kama walivyotaka. Vivyo hivyo Mwana wa Mtu anaenda kuteswa nao." Hapo wafuasi walifahamu ya kuwa amesema nao habari ya Yohane Mbatizaji.
Injili ya Bwana.