MASOMO YA MISA, KUMBUKUMBU YA MT. DOMINIKO, PADRE, AGOSTI 8, 2024
RANGI YA KILITURJIA: NYEUPE 🤍
SOMO LA KWANZA
YEREMIA 31:31—34
Nitafanya agano jipya. Sitaikumbuka tena dhambi yao.
Somo katika kitabu cha Nabii Yeremia
"Tazama, siku zitakuja asema Bwana – nitakapofunga agano jipya na nyumba ya Israeli, na nyumba ya Yuda pia. Halitakuwa kama agano nililofunga na baba zao, siku nilipowashika mkono, ili kuwaondosha katika nchi ya Misri. Nao walivunja agano langu mimi, niliyekuwa bwana wao- asema Bwana. Bali, agano nitakalofunga na nyumba ya Israeli, baada ya siku zile, litakuwa hivi, ndilo neno la Bwana: Nitaweka sheria yangu ndani yao, nitaiandika katika mioyo yao. Mimi nitakuwa Mungu wao, nao watakuwa taifa langu. Hawatahitaji tena kufundishana, kila mmoja jirani yake, wala kila mmoja ndugu yake, wakisema., "Mmjue Bwana!" Maana wote watanijua, wadogo kwa wakubwa - asema Bwana - kwa kuwa nitalisamehe kosa lao, wala dhambi yao sitaikumbuka tena."
NENO LA BWANA... TUMSHUKURU MUNGU
ZABURI YA KUITIKIZANA
ZABURI 51:12—13, 14—15, 18—19 (K. 12a)
K. Uniumbie moyo safi, ee Mungu.
Uniumbie moyo safi, ee Mungu;
ufanye upya roho thabiti ndani yangu.
Usinitupe mbali na uso wako;
wala usiniondolee roho wako mtakatifu. K.
Unirudishie furaha ya wokovu wako;
unitegemeze kwa kunijalia roho sikivu.
Nitawafundisha waasi njia zako,
nao wenye dhambi watarudi kwako. K.
Kwa maana hupendezwi na sadaka, la sivyo ningalikutolea;
wewe hupokei sadaka ya kuteketezwa.
Sadaka ya Mungu ni roho iliyovunjika:
moyo uliovunjika na kupondeka,
ee Mungu, hutaudharau. K.
SHANGILIO LA INJILI
MATHAYO 16:18
K. Aleluya. W. Aleluya.
K. Wewe ndiwe Petro, na juu ya mwamba huu nitalijenga Kanisa langu, na milango ya kuzimu haitalishinda.
W. Aleluya.
SOMO LA INJILI
MATHAYO 16:13—23
Wewe u Petro, na nitakupa funguo za ufalme wa mbinguni.
† Somo la Injili takatifu ilivyoandikwa na Mathayo
Wakati ule: Yesu aliingia sehemu ya Kaisaria Filipi. Akawauliza wafuasi wake, Watu wanasema Mwana wa Mtu ni nani?" Wakasema, "Wengine Yohane Mbatizaji, wengine Eliya, tena wengine Yeremia au mmojawapo wa manabií." Akawaambia, "Na ninyi mwasema kuwa mimi ni nani?" Simoni Petro akajibu, "Wewe ndiwe Kristo, Mwana wa Mungu mzima." Yesu akamjibu, "Mwenye heri wewe Simoni mwana wa Yona, kwa maana si mwili na damu vilivyokufunulia hayo, isipokuwa Baba yangu aliye mbinguni. Nami nakuambia, wewe ndiwe Petro, na juu ya mwamba huu nitalijenga Kanisa langu, na milango ya kuzimu haitalishinda. Na wewe nitakupa funguo za ufalme wa mbingu. Lolote utakalofunga duniani, litafungwa mbinguni pia; na lolote utakalofungua duniani, litafunguliwa mbinguni pia." Kisha akawaonya wafuasi wake wasimwambie mtu ya kuwa yeye ni Kristo. Toka wakati huo, Yesu alianza kuwaonya wafuasi wake ya kwamba imempasa kwenda Yerusalemu na kupatwa na mateso mengi kwa wazee, makuhani wakuu na Waandishi na kuuawa, na siku ya tatu kufufuka. Petro akamchukua upande, akaanza kumwonya na kusema, "Mungu akurehemu, Bwana. Hayo hayatakupata, hasha." Akageuka, akamwambia Petro, Nenda nyuma yangu, Shetani! U kikwazo katika njia yangu, kwa maana mawazo yako si ya Mungu, bali ya kibinadamu."
INJILI YA BWANA... SIFA KWAKO EE KRISTO