Karibuni ndugu zangu katika adhimisho la misa takatifu asubuhi ya leo. Leo safari yetu ya kuusikia waraka wa mtume Paulo imefikia ukingoni. Leo waraka utaisha na jumatatu tutaanza kitabu kipya. Kwa kweli ilikuwa ni safari ndefu juu ya huu waraka na kwa kweli umebeba theologia kubwa na nilijitahidi kuelezea japokuwa kulitokea sherehe na kumbukumbu za hapa na pale zilizobadilisha masomo na kuruka baadhi ya sehemu za waraka huu.
Na sasa tuliangalie somo letu la leo linalomalizia waraka huu. Kwa kweli hapa Paulo anaonyesha shukrani tu katika hili somo. Anashukuru. Anawakumbuka waliomtendea wema mkubwa, waamini waliomtetea na kumpigania. Anamshukuru Mungu sana kwa niaba yao. Yaani ukiangalia unaona kwamba Paulo anamalizia waraka wake kwa hisia kubwa na furaha kubwa na matumaini makubwa. Unaona kwamba anaona kwamba mbeleni kuna matumaini makubwa. Yaani kwa kweli amemalizia vizuri na shukrani zake zinavuta sana hisia. Halafu anamalizia kwa sala ya kumtukuza Mungu. Safi sana. Kwa kweli huyu ni mtume, huyu ni mchungaji wa kweli na kwa kweli alianzia katika upole, polepole akaweza kukua taratibu hadi kufikia hapo alipo.
Katika injili, Yesu anawaambia kwamba wasiache kuwa waamifu katika mambo madogo. Mali ya kidunia kwa kweli ni ya hali ya chini sana. Yesu anawaambia kwamba wasipoweza kujifanyia rafiki katika mali ya kidunia, mali ya kidhalimu, yaaani wasipoweza kuaminiwa na wanadamu wenzao katika mambo yao ya kidunia, au kama watashindwa hata kuelewana na kuwa rafiki na wenzao wa duniani, kwa kweli hawataweza kuaminiwa katika mambo makubwa Zaidi. Kama utashindwa kuwa mwaminifu kwa mwenzako, kwa Mungu huwezi. Hapa anataka kuwaeleza kwamba maisha ya duniani kwa kweli ni kipimo au daraja kwa maisha yajayo, ukishindwa hapa huko kwingine hapana.
Hivyo, ndugu zangu tunapaswa kuthamini kile tulichokabidhiwa na wenzetu ndugu zangu. Kama wewe ni mhasibu halafu umeshindwa kutunza pesa na ukazitapanya jua kwamba unajiharibia sifa yako kwa maisha yajayo. Kama wewe ni daktari au mwalimu au dereva lakini umeshindwa kuwa mwaminifu kwa wale unaowahudumia, jua kwamba unajiharabia sifa yako kwa maisha yajayo. Hutaaminiwa kama hapa ulishindwa kuwa mwaminifu kwa mambo haya madogo madogo ya kidunia.
Mtakatifu Paulo wa somo la kwanza kwa kweli ameonyesha uaminifu wa hali ya juu na kwa kweli unaona kwamba hata hapa duniani alizidi kuaminiwa na kupanda kila siku akipewa mambo makubwa Zaidi hadi kuwa mtume wa mataifa. Na sasa huko mbinguni atakuja kutufungulia geti na kutuhukumu siku ya mwisho.
Lakini walioshindwa kuwa waaminifu kwa vile vidogo walivyokuwa navyo kama akina Yuda Iskarioti au jeuri hawakuaminiwa chochote katika mambo makubwa. Kama unashindwa kuhudumia familia yako je, waweza kuaminiwa kuwa kiongozi wa jumuiya? Fanya mambo yote kwa uaminifu hata kama ni madogo sana, utaaminiwa kwa makubwa.
©️ Pd. Prosper Kessy OFMCap